Nongstoiñ, Lber, 10: Ka Seng Samla Shnong Sohparu ha ryngkat ka jingïatreilang bad ka office jong ka Nehru Yuva Kendra Sangathan Nongstoiñ, ha ka 8 tarik mynta u bnai ka la ïoh ban rakhe ïa ka sngi ba kyrpang ki kynthei lane ‘Women International Day 2023”, ha ryngkat ka jingïadonlang jong u sordar shnong Sohparu Bah G.R Marweiñ bad Secretary Bah G.S Marweiñ lem bad ki riew rangbah shnong.
Ha kane ka sngi la wan ban ïashimbynta ha ka programme da ki shnong ba marjan bad ki dkhot kumba 84 ngut ei ei kynthup ïa ki kynthei bad shynrang. La ïoh ïa ka jingkren na ar ngut ki nonghikai school Bah J.L nonglait bad Kong Daïa Nongsiang, kiba la kyntu kynpham ïa ka ki longkmie bad kren ruh shibun shaphang ki article jong ki longkmie ïa kaba la pynkup bor da ka sorkar India.
Ha kane ka sngi ka Seng Samla Shnong Sohparu ka la ïoh ruh ban ai khusnam ïa ar ngut ki mei ieid ba la palat ïa ka 95 snem, kata ki long I mei ieid Trelina Marweiñ bad i Krianlina Lyngdoh kum ki longkmie ba la tymmen tam hapoh shnong.
U Sordar Shnong u la kyntu kynpham ïa ki longkmie bad ïa ki samla ban nang roi ha ki por ban nang wan.
