Ka jingthang ïa ki tyngshop ki MLA ka pynjem rngiew ïa ka jaitbynriew: P.Nongshlong

Nongstoiñ, Lber, 10: “Ka jingpynkhihwin jong ki katto katne ki sengbhalang hadien ba la dep pynbna ïa ka risol election da kaba pynlong ïa ki jingïalang paitbah ryngkat ka jingthang ïa ki tyngshop jong ki MLA, ka la pynjem rngiew haduh katta katta ïa ka jaitbynriew Khasi Pnar”, ong u bah P.Nongshlong uwei na ki riew rangbah na Mawiamsyiem West Khasi Hills.
U la ong ruh ba katei ka jingleh kan ym wanrah ïa ka jingbha lano lano ruh, hynrei ka long pynban u thied jong ka jingïa bishni para Khasi. Nalor kata u la ong ruh ba ha ki snem ba la dep ha ka por ba ka jingïakhih pyrshah ïa ka Citizenship Amendment Bill (CAA), ka la don ka jingthang ïa ki tyngshop dur bula jong u Narendra Modi Myntri Rangbah duh ka ri, ka jong u Amit Shah Myntri ka tnad kam pohïing ka ri bad jong kiwei kiwei. Hynrei ka Agatha Sangma ka MP jong ka Tura seat, ka la mynjur ha Lok sabha ban pyntreikam ïa katei ka aiñ bad ka jingthang tyngshop ha kylleng ki jaka la ha sor ne ha kyndong kam shym la trei kam satia.
Nalor kat hadien ba ka Agatha Sangma ka la mynjur, dang ha une u snem 2022 ka BJP ka la wanrah sa kawei pat ka aiñ kaba kham shyrkhei bad kata ka dei ka Uniform Civil Code kaba la rah haduh ka Ïingdorbar Rajya Sabha, hynrei u Dr W.R.Kharlukhi MP na ka party NPP um shym la kren ei ei wat tang shi kyntien bad ka jingsngap jar jong u ha katei ka Dorbar bah, ka pyni shai kdar ba u mynjur ban pyntreikam ïa katei ka aiñ.
U bah Nongshlong u la ong ruh ba ka risol ha kane ka election ba la dep ka NPP ka la jop haduh 18 ngut ki kyrtong na rilum Garo. Kane ka pyni shai kdar ba ki paitbah Garo kim ju pyrshah ïa kano kano ka aiñ kaba ki nongmihkhmat ki mynjur ha Ïingdorbar Thaw Aiñ, namar ba ka NPP ka shu ïapher tang ka kyrteng hynrei ka NPP bad ka BJP ki dei ka juh ka party. Nalor kata u la ong ruh ba katba ki Khasi ki dang ïa lympat para Khasi, ki paralok Garo pat ki nang rkhie, namar ba ki ithamula ïa ka jingbiej bad ka jingbym ïa tylli.
U la ong ba lada ki paitbah Khasi Pnar ki dang shah pynbiej ha ka pisa ha ki por election bad ki dang sngew tynnad ban shah synshar ha kiwei pat ki party, ka la bha ba nangne shakhmat ba kim dei shuh ban dang pynsngew sha ki paitbah ba ki kwah ban synshar noh hi da ki party trai ri ne ki party riewlum. Hynrei kin shu aiti beit ha ki nongïalam kiba dei na Garo Hills namar naduh u snem 1970 ba ka sorkar India ka la ai ïa ka Sub State, la thung Myntri Rangbah da u Capt Williamson A.Sangma.
Naduh katei ka por man ki san snem ba long Myntri Rangbah da u Garo ka sorkar ka neh haduh ba kut san snem. Hynrei lada long Myntri Rangbah da u Khasi ka sorkar kam ju neh, namar ka jur palat ka jingïabishni para Khasi bad nangne sha khmat ki la dei ban ai Myntri Rangbah beit da u Garo, lait noh satang lada ki paitbah Khasi Pnar ki la kylla ba mut.