Shillong, Rymphang, 16: Ka Kong Antonette Sohtun ha ka miet sngi Balang ka la mudui da ka ejahar ha ki Pulit ka Jhalupara Out Post pyrshah ïa u Bah Mahendro Rapsang uba long ruh u kyrtong jong ka National Peoples Party (NPP) na West Shillong Constituency halor ka jingkynnoh ba u leit byrngem byrsit ïa u kurim jong ka ha ingsah kaba don ha Mawbah Lumphyrnai kaba dang hap hapoh ka West Shillong Constituency.
Ha ka ejahar ka Kong Antonette, ka la kynnoh u Bah Mahendro Rapsang ryngkat lang bad ki nongbud hapdeng ka jingshoh khawiang ki la kyndar ïa ka jingkhang iing bad ker kut ruh ïa ka iing baroh kawei ha ka por kumba 11:00-11: 45 baje mynmiet da kaba kren ruh ïa ki tien sih tien sang bad byrngem byrsit ruh ïa u kurim jong ka, u Bah Droshing Lyngdoh u bym pat don satia ha iing ha kane ka por bad uba dang wan phai sha iing na la ki kam.
Hadien kane ka jingjia, u Sector Magistrate jong ka tnat pynïaid elekshon lem bad ki Pulit ki la hiar sha ka shnong Mawbah Lumphyrnai ban leit jurip ïa ka iingsah jong ka Kong Antonette hadien ka ladep ban mudui da ka ejahar ha thanat Jhalupara.
Halor kane ka jingjia, u Bah Mahendro Rapsang u la kyntait ban ai jingpynshai watla na ka liang jong u nonglum khubor u la telephone ïa u ban pan jingpynshai halor ka jingshah kynnoh jong u ha ka Kong Antonette.
U Bah K. Nongkynrih uwei na ki nongshong shnong uba la sakhi ïa kane ka jingjia u la pynrem jur ïa u Bah Mahendro Rapsang bad ïa ki nongbud jong u bad dawa ruh ïa ki bor Pulit ba kin leh ïa kaba donkam katkum ki kyndon jong ka aiñ.
