MSL 5: Pynjemkhnap ka Nongkseh haduh 13 kol ïa ka Umkaber, mad jingjop ka Mawlai, SLFC bad ka RUFC

Shillong, ïaïong 20: Ka Nongkseh SSCC ka la mad ïa ka jingjop kaba khraw da kaba pynjemkhnap haduh 13-0 ïa ka Umkaber SCC ha ka jingïalehkai jong ka Group A ha ka lympung 5th Meghalaya State League, hynne ka sngi Nyngkong ha madan First Ground-SSA Stadium.
Ka dei ka sngi kaba phuhmut phuhmat ïa ki san tylli ki klob ïalehkai kiba na Shillong kiba ïakhun hynne ka sngi Nyngkong, ha kaba kawei pa kawei ka la khur ïa ka jingjop da kaba suk ban jam sha ka kyrdan ba ha khlieh duh ha la ki jong ki jong ki Group. La sakhi ruh ïa ka jingjop na ka bynta ka Umlakro SC ha ka Group F bad ka A’chik SCO Rongjeng ha ka Group G.
U Chesterpaul Lyngdoh (5′, 45′, 56′) bad u Shano Tariang (12′, 38′, 52′) ki la ïoh ban thep hat-trik, katba u Khrawkupar Jana (32’P, 45’+1), u Kitboklang Pale (57′, 78′) bad u Sheen Sohktung (70′, 82′) ki la pynkhihjar mar ar sien na ka bynta ka Nongkseh. Ka la don ruh kawei ka kol kaba la kum bakla thep hi (own goal) da u Banshanlang Kharsynniang (30′) jong ka Umkaber.
Ka Umkaber ka la shah lamkhmat haduh lai kol ha ka por ba u Andriano P Mawlong u la ïoh beit beit da ka red card hadien ba u la tan pynkyllon ïa u Shano hapoh phyllaw kol (box) ha ka jingpyrshang ban khanglad ïa une u rangïalehkai ban thep kol. Ka jingshah pynduna sha ka 10 ngut ka la nang buh jingeh ïa ka Umkaber bad ka la shah thep sa saw kol shuwa ka por shongthait bad nangta sa hynriew kol ha ka kylla miet.
Nalor ki ar tylli ki hat trik ha nongbah Shillong, sa kawei pat ka hat-trick la thep ha Amlarem da u Damanbhalang Chyne (12’, 28’, 44’P) ha kaba ka Mawlai SC, kaba dei ka lahduh ba ïada ïa ka burom, ka la pynliem ïa ka Lamin XI SCC da 6-1 kol ha ka Group C.
Kiwei pat kiba la pynkhihjar na ka bynta ka Mawlai ki long u Arkibor Makhroh (17′), Basuklang Bina (32′) bad u Wadshwa Latoo (86′), katba u Shanbor Sumer (19′) u la thep ïa ka shi kol jong ka Lamin XI.
Ha ka Group B, kaba long ha MFA Ground ha Shillong, ka Nangkiew Irat SC ka la pynliem noh ïa ka Mawphu SC da 3-0, ha kaba baroh lai tylli ki kol la thep ha ka kylla step lyngba u Dibinroy Nongspung (5′, 38′) bad u Banshanlang Nongdhar (43′).
Kajuh ka resol da kajuh ka jingkheiñ la sakhi ha ka jingïakhun ha Williamnagar ha kaba ka A’chik SCO Rongjeng ka la pynliem ïa ka Attong Matgrik FC da 3-0 ha ka Group G. Hangne, baroh ki kol la thep ha ka kylla miet lyngba u Perioush N Sangma (50’) bad u Klubarth M Sangma (66’, 72’).
Na ka bynta ka Attong Matgrik, kane ka dei ka jingshah rem kaba ar sien lynter, bad kawei pat ka kynhun kaba la shah rem ar sien lynter ka dei ka Mishon SSCC ha ka Group F. Hadien ba ka la shah pynliem noh ha ka Langsning FC ha ka taïew ba la dep, hynne ka sngi ka la mad ïa ka namrem da 1-0 kol ha ka Umlakro SC ha Mairang, ha kaba u Jewelstar R Marak (6’) u la thep ïa katei ka namtam tang katto katne minit mar ïa sdang.
Ha kawei pat ka jaka, ha Wahiajer, ka Shillong Lajong FC, kaba dei ka lahduh jong ka MSL ha u snem 2019, ka la mad ïa ka jingjop da 3-1 pyrshah ïa ka Lamyrsiang SCC ha ka Group E. U Hamedamanbha Wahlang (27′), u Lalmuansanga (46′) bad u Deibormame Tongper (63′) ki la pynkhihjar na ka bynta ka Lajong, katba u Eborki Marsharing (45’+2) u la thep ïa ka shi kol jong ka Lamyrsiang.
Ha Mawkyrwat, ka Rangdajied United FC, kaba dei ka lahduh ha u snem 2023, ka la pynliem ïa ka Seng Samla Umdang Pyllun da 3-1 kol. Hangne u Pasborlang Khonglikong (9′), u Phibankhrawbok Nongkhlaw (31′) bad u Khainkupar Iawphniaw (62′) ki la pynkhihjar na ka bynta ka Rangdajied ha kane ka jingïalehkai jong ka Group H shuwa ba u Rangkynsaistar Mawsor (86′) un pynphai shi kol ïa ka SS Umdang Pyllun.
Khatduh, ka jingïakhun jong ka Group D hapdeng ka Ladthadlaboh SC bad ka Jalaphet Moochut Pyrdung SC ka la kut ha ka jingïakhaid, ha kaba baroh arliang ki la thep mar 2-2 kol ha Khliehriat. Ka JM Pyrdung SC ka la lamkhmat lypa da 2 kol ha kane ka jingïalehkai lyngba u Thomas Dkhar (57′) bad u Briwon Dkhar (59′) hynrei ka Ladthadlaboh ka la durut dohïap ban wanphai lyngba ki kol na u Andrew Nanghuloo (71’P) bad u Evening Tariang (90’+1).

Ka prokram ïalehkai ha kane ka sngi Ba-ar (Baroh kin sdang ha ka por 3 baje nohphai sngi):
Group A (Shillong) – Khimusniang SC pyrshah ïa ka Mawshun SCC
Group B (Shillong MFA Ground) – Mulang SC Nongbah vs Mawlum Tyrsad SCC
Group C (Amlarem) – Amlarem SC pyrshah ïa ka Laskein SC
Group D (Khliehriat) – Rymbai Shkenshynriah SC pyrshah ïa ka Thangskai Tiger SC
Group E (Wahiajer) – Ym don jingïalehkai
Group F (Mairang) – Lawbah SC pyrshah ïa ka Langsning FC
Group G (Williamnagar) – Maram FC pyrshah ïa ka Janepih YSCA
Group H (Mawkyrwat) – Mawten SC pyrshah ïa ka Mawlarshong SC