Shillong, Nailur 04: Shi sngi shuwa ka jingrakhe ïa ka sngi burom ki nonghikai lane ka Teacher’s Day kaba dei ha ka 5 tarik u Nailur, ki nonghikai Primary hapoh ka shatri jong ka All Meghaya Primary School Teachers Association (AMPSTA) ki la pynlong ka jingïaid paidbah ha nongbah Shillong ban pynsngew sha ki bor sorkar ïa ki jingdawa jong ki.
Ki mat jingdawa ba kongsan jong ki nonghikai Primary ki long ban siew thikna ïa ka tulop man la u bnai, nangta ban pynkhie im biang ne ban bteng biang ïa ka jingsiew bai bam tymmen ne ka penshon kaba ka sorkar ka la pynsangeh ban siew noh naduh u snem 2010 bad kumjuh ruh ban ai noh ka jingithuh ïa ki nonghikai LP.
Kane ka jingïaïaid paidbah ki nonghikai ka long da ka lynti kaba jai jai da kaba ki la rah da ki banner bad ki placard ban pynsngew ïa ki jingdawa jong ki, kala sdang naa Community Hall jong ka Dorbar Shnong Pynthorumkhrah, nangta kila ïaid sha Polo, bad kiew sha sha ka surok Hotel Polo Towers bad shaduh City Hut Dhaba bad iaid nadien ka ïing u Lat ban wan phai sha Pynthorumkhrah, ha kaba la ïoh ban pynlong ïa ka jingïalang ryngkar ka jingïapyrta slogan ban pynpaw ïa kine ki jingdawa jong ki.
