Maramot noh ïa ki surok Langpih dawa ka Synjuk Nongsynshar Shnong Nongmynsaw

Nongstoiñ, Jylliew 28: Ka Synjuk ki Nongshynshar Shnong Nongmynsaw Syiemship ha ka sngi thohdieng, ka la leit ban ïakynduh ryngkat ka jingthoh markhmat bad u Executive Engineer PWD (Road) Mawshynrut Division, ban pynsngew ïa ki jingeh ka dong ka thaiñ ha ka jingïadei bad ki surok khamtam eh ha ka thaiñ Langpih.
Ha ka jingïakynduh ka synjuk ka la pynpaw ïa ka jingdonkam ban maramot noh ïa ka surok Ktiehthawiar sha Langpih. Kumba long haduh mynta kane ka surok ka long kawei na ki surok ba kongsan haduh katta katta ïa ka thaiñ Langpih hi baroh kawei. Hynrei mynta ka la jot bad pra lut kaba ym lah shuh ban ïaid ki kali khamtam lada dei ki sngi ba jur slap.
Ïa kane ka surok la ïoh ban siang rong naduh u snem 2010 bad haduh mynta la 16 snem tam kam pat shym la ïoh jingmaramot wat tang shisien ruh.Kumta ka jingjot jingpra jong kane ka surok ka la long kaba la shyrkhei haduh katta katta, pynpaw ki nongïalam ka synjuk.
Ka synjuk ka la pynpaw ruh halor ka jingdonkam ban trei pyndep noh ïa ka surok thymmai na Langpih sha Mawdiangsnam. Kane ka surok ka long kaba la mang ban shna na Iew Langpih shaduh ka surok ban leit sha Mawdiangsnam, hynrei haduh mynta ym shym pat la pyndep sa kumba 300 mitar eiei na lad Mawdiangsnam ban siang rong.
U Bah Sandiwel Synchiang President ka synjuk u la ong, “Ki nongïalam ka synjuk ki la ïoh ruh ban pynshai bniah hakhmat u EE ba kane ka surok ka don hapdeng ka jingeh namar ka jingpyndik jong ka Assam ban trei. Ha kaba ïadei bad kane na ka liang ka Synjuk ngim sngew ïahap ba ka sorkar kan shu ai daw haba ngim shym la pat ïohi dak ei ei ba la sdang bteng ban trei ïa kane ka surok”.
“Kumba ka long baroh shi katta bun bah ki kam pynroi kiba ka Sorkar Assam ka trei ha ka thaiñ balei pat lada trei ka Meghalaya ki pyndik. Kum ki nongïalam shnong ka thaiñ ngi kyntu ba ka sorkar kan bteng beit ban trei ïa kane ka surok na Langpih lad Mawdiangsnam sha Mawdiangsnam.Ka sorkar ka dei ban sngap ïa ka jingdawa jong ki paidbah nongshong shnong ym ban sngap ïa ka Sorkar Assam”, u la ong.
Katba na ka liang u Bah Serbilin Lyngdoh Secretary ka synjuk u la ong, “Ngi la pynpaw hakhmat u EE ban pynsted ban pyntrei noh ïa ki surok PMGSY-IV ba la dep jurip ha ki snem bala dep. Kum ki Nongïalam shnong ngi sngewkmen ba na ka liang ka department ka la jurip (survey) na ka bynta ki surok PMGSY ha ka thaiñ”.
“Kine ki surok ki kynthup ïa ka surok Mawdiangsnam sha Umyiap, Mawsikar sha Umbyrsit, Mawlan-A sha Umwali, Langpih sha Mawdiangsnam, Langpih sha Nongma, Ïewnongma sha Nongmawleiñ bad kiwei kiwei. Halor kine ki surok na ka liang u EE ka Mawshynrut Division u la pyntikna ba kin ïaid beit shakhmat bad urlong shen”, ong u Bah Serbilin Lyngdoh.
Na ka liang u Executive Engineer PWD (Road) Mawshynrut Division, u la ïathuh ba ïa ka surok Ktiehthawiar sha Langpih, na ka liang ka Office jong u ka la dep ban pynbiang ïa ki kot ki sla bad phah sha ki bor ba halor ban ïoh ïa ka jingmynjur. Nalorkata, u la pyntikna ruh ba na ka liang jong u, un shimkhia ban buddien ba kan kham kloi ka kam.