Shillong, Nailar 29 : U MLA ka TMC na Nongthymmai u Charles Pyngrope ha ka sngi Palei u la kyrpad ïa ka sorkar jylla ba kan mang pisa lang 5 klur tyngka na ka bynta ban shna pynbha biang ïa ki surok hapoh constituency jong u da kaba ong ruh ba jan mar shiteng ki Myntri Sorkar ki sah ha constituency jong u.
Haba bynrap lang ha ka kynti kylli jingkylli, u Bah Charles u la ong, “Shiteng na ka kynhun myntri ki sah hangne hynrei ki surok ha Nongthymmai ki long kiba sniew bha lait noh tang ka surok na iing u Symbud Myntri Rangbah sha iing jongnga.”
Shuh shuh u da jer kyrteng ruh ïa ki Myntri Sorkar kiba sah ha Nongthymmai constituency da kaba sdang na u Symbud Myntri Rangbah Bah Prestone Tynsong, nangta u Myntri ka tnad Veterinary Bah AL Hek, u Myntri ka tnad Food CivilSupplies Bah Comingone Ymbon, u Myntri ka tnat PHE u Marcuise N Marak bad kiwei kiwei kiba sah bad kiba don iing ha katei ka constituency.
Da kaba ong ba ka thup kyrteng ka lah ban nang jrong, u Bah Charles u la ong, “Nga kwah ban tip la un (Bah Prestone) mang neem 5 klur tyngka na bynta ban shna pynbha ïa ki surok ha Nongthymmai constituency.”
Hynrei haba jubab halor kane, u Symbud Myntri Rangbah u la ong ba ka thong jong ka tnad hi ka long ba khamtam ha nongbah Shillong ba ki surok kin dei ban long kiba bha.
U la ïathuh ba u la dep ban bthah ruh ïa ki engineer ba kin leit bad ai jingkheiñ na ka bynta ban pynbha ïa ki surok ha Shillong.
Shwa kane, u Bah Prestone u la pyntip ba ki don saw tylli ki projek surok kiba dang don mynta ha ka jingpynbit pynbiang ban shna ha Mawphlang constituency.
Ïa kane u la jubab halor ka jingkylli ba la wanrah da u MLA ka Mawphlang u Bah Matthew B Kurbah hapoh ka Iing Dorbar. U la ïathuh ruh ba kine ki kynthup ïa ki ar tylli ki projek hapoh ka PMGSY bad 2 tylli hapoh ki skhim jong ka jylla.
La ïathuh ba kine ki kynthup na Thain Thynroh sha Umsawmat ter ter sha Lyngdoh Phanblang bad sha Mawngap Mawkharshiing (PMGSY-III), ka jingshna pynbha ïa ka surok Mawphlang Cart Road bad surok Mawphlang Balat (Wah Umpamtiah sha Weiloi) nalor ka jingshna pynbha bad shna ïa ka surok ban leit sha Law Kyntang Mawphlang.
