Mih jyndat ki VPP na Assembly ba ai jubab ha u Myntri ba la kren pynshit pher jaidbynriew

Shillong, Nailar 29 :Ka Voice of the People Party (VPP) kaba don ha ka liang Pyrshah mynta ka sngi,kala mih jyndat ha ka por ba dang ïaid ka Dorbar kum ka dak ka jingpyrshah ïa ka u Rakkam Sangma, Myntri ka tnad pule puthi, ubala ïeng ban jubab ïa ka jingïatai Short Duration Discussion ba la wanrah da u Bah Ardent Miller Basaïawmoit, MLA ka Nongkrem ha kaba ïadei bad ka jingthungkam Nonghikai ha Daddengre Sub Division.
Ha shuwa ban sdang ïa ka jingbatai halor kane ka mat kaba u la wanrah, u Bah Ardent, u la ong ba um kwah ba u Myntri ka tnad pule puthi, u Rakkam Sangma un jubab ïa kane ka jingïatai namar ba udei u briew uba wanrah ïa ka jingïapher jait hapdeng ki Khasi bad ki Garo kaba long ka jingpynkheiñ ïa ka kyndon ba 196 jong ka aiñ Bharatiya Nagarik Suraksha Sanhita (BNSS). “Ngim kwah ban sngap ïa ka jubab na u dkhot ka ïingdorbar uba kwah ban don ka jingïaumsnam hapdeng u Khasi bad u Garo”, la ong u Bah Ardent da kaba kdew ïa ka jingkren ïalap elekshon u Rakkam Sangma ha ka por ka elekshon MP mynta ka snem, ha kaba u la beiñ u la khoh ïa ka VPP da kaba ong ba lada jop ka VPP kan wanrah ka jingïaumsnam hapdeng ki Khasi bad Garo.
U MLA Nongkrem, u la kyntu ïa u Speaker ban phah jubab ha u Myntri Rangbah ne ha uwei na ki Symbud Myntri Rangbah ïa kane ka jubab. Hynrei hadien ba la kut ka jingïatai, u Deputy Speaker, u Timothi D. Shira, uba pynïaid ïa ka ïingdorbar, u la phah jubab ha u Rakkam ïa kane ka jingïatai. U Shira u la ong ruh ba katkum ki rule haba u Myntri ba dei peit ïa ka tnad u don hapoh ïingdorbar bad namar ba kadei beot ka mat kaba ïadei beit bad ka tnad kaba u bat, un hap jubab beit ma u. U Bah Prestone Tynsong, Myntri ka tnad Parliamentaray Affaris ne kam ïingdorbar, u la kyrshan ïa ka jingong u Deputy Speaker ba kadei ka kamram u Myntri ban jubab haba u don hapoh ïingdorbar.
Ha kajuh ka por u Bah Prestone, u la ong ruh ba kane ka jingkynnoh u MLA Nongkrem ïa u Rakkam, ka long ka jingkynnoh kaba ktah shimet ïa u dkhot ka ïingdorbar ba dei ban weng noh na ki recrod jong ka Assemly. U la ong ruh ba ym dei ban wanrah ha ïingdorbar ïa ki kam shimet, namlor ba ka Seng VPP ka la ujor ejahar pyrshah ïa une u dkhot ba ka kynnoh bad kadei ban ailad ïa ka aiñ ba kam leh la ka kam.
Namar ba u Deputy Speaker u la ailad ïa u Rakkam ban jubab halor kane ka mat thung nonghikai ha Daddengre, ki MLA ka VPP ki la mih jyndat noh na ïingdorbar, ha kaba u Bah Ardent u la pynpaw ba kumba u la ong nakhmat ba um kwah ban sngap ïa ka jingjubab na u dkhot uba long communal ne pynïapher jaidbynriew, kumta ki MLA ka VPP kin mih noh na ïingdorbar ba kin nym sngap ïa u.
na ka Dorbar Synrai kum ka dak ka jingpyrshah ia ka rai ban ailad ia u Myntri ka tnad Pule Puthi Rakkam A Sangma ba un jubab ha Iingdorbar khlem da leh eiei pyrshah ia u halor ka jingkynnoh ba u don bynta ban kren shun ia ka party.
Tang mar syn pynbna u Symbud Lamphang Timothy D Shira ia ka rai ban ailad ia u Myntri ka Tnad Pule Puthi ba un jubab ia ka mat iatai ba lyngkot bala wanrah da u President ka VPP bad MLA ka Nongkrem Ardent M Basaiawmoit halor ka jingthungkam Nonghikai ha Dadenggre Sub-Division, u Bah Ardent lem bad ki laingut kiwei pat ki MLA ka VPP kila ieng na shuki bad mih noh shabar haba kynthoh “khlem ka rain ka rem, khlem ka rain ka rem”.
Hashuwa ban iamih shabar, u Bah Ardent ula ong “Ngan ym sngap satia ia u Myntri ka tnad Pule Puthi. (Ka jingkren shun jong u) ka dei ka jingpynkhein ia ka 196 jong ka BNSS. Lada u CM lane uwei na ki DyCM kim ai jingkren halor kane ka kam, ngan ym sngap satia”.
Ula byrngem ruh “Lad aka Sorkar ka ailad ia u (Myntri) ban jubab, ngin mih noh shabar. Ngim kwah ban don ka jingiakynad hapdeng ki Khasi bad Garo. Ka jingkren jong u kala aiding ban iashun hapdeng ki ar jaitbynriew”.
Shuwa kane, u Symbud Myntri Rangbah Bah Prestone Tynsong ula ong ba ka Rules ka ong ba u dkhot haba ai jingkren, um dei ban kynnoh shimet pyrshah ia ki dkhot.
“Kumta, nga pyrkhat ba ngin ailad ia u Myntri ban jubab naba u MLA ka Nongkrem Bah Ardent Basaiawmoit ula ieng bad pyrshah ia kane. Nga kwah ban kren shai ba ki jingkynnoh (pyrshah ia u Myntri) ki dei kiba ktah shimet. Kumta ngi la weng noh ia kane ka lain”.
Ula ai jingmut ruh ia u Nongialam ka VPP ban ailad ba ka ain kan iaid hala ka jong ka lynti naba ki (VPP) la dep ban ujor da ka ejahar pyrshah ia u Myntri.
Kat kum ka jingong jong u, ka VPP kala wanrah ia kane ka kam hapoh ka Iingdorbar khlem kano kano ka kyndon.
“Balei ba ngi wanrah ia kane ka kam hapoh ka Iing. To ai ba ngin iaid kat kum ka rule. Kane ka dei ka jingkynnoh ba shimet pyrshah ia u dkhot, uba dei ruh u Myntri ha ka Sorkar” ong u bah Prestone.
Ha kane kajuh ka sngi shong dorbar u Lamphang ka Iingdorbar Thaw Ain Thomas A Sangma ula pyndam ne weng noh ïa ki katto katne ki jingkren jong u President ka Voice of the People Party (VPP) Bah Ardent M Basaiawmoit haba wanrah ïa ka mat iatai kaba lyngkot ha Iingdorbar Thaw Ain.
U Thomas ula ong ba une u nongwanrah ïa ka mat, ula pyndonkam ia ki katto katne ki kyntien ki bym ïahap bad kila long pyrshah ïa ka rules bad kumta, ïa kine ki kyntien ym dei ban ailad ba kin long shi bynta jong ka jingiakren hapoh ka Iingdorbar.