Shillong, Nohprah, 03 : U Myntri Rangbah ka Jylla u Conrad Kongkal Sangma ha ka sngi Thohdieng u la leit jngoh ïa ki arngut ki nongshong shnong jong ka shnong Mukroh kiba dang shah sumar ha NEIGRIHMS Hospital, Shillong kiba la mynsaw jur na ka jingshah siat kuli ha ki Pulit Assam ha ka 22 tarik u bnai baladep ha ka shnong Mukroh, West Jaiñtia Hills District.
Ha ka jingleit jngoh ïa kine ki arngut kiba mynsaw, u Myntri Rangbah u la aiti da ka Cheque kaba mar T.50 hajar khnang ba kin dup lah ban pynlut katba ki dang don hapdeng ka jingshah sumar ha kane ka hospital.
Katkum u kyrwoh ba la pathai ha ka Facebook Page, u Myntri Rangbah u la pyntip ruh ba ka Sorkar Jylla kan sa bei lut nadong shadong bad ïa ka jinglut jingsep ha kaba ïadei bad ka bai sumar katba ki dang don ha NEIGRIHMS, Hospital.
U Myntri Rangbah u la kitbok kitrwiang ruh ïa kine ki arngut ba kin ïoh noh ïa ka met kaba koit bakhiah ba kin dup lah ban leit phai noh shen sha la ki jong ki bahaing hasem.
