Plie u CM ïa ka ophis bapura ka [27]7.ai ha Shillong Tech Park, Umsawli

Shillong, Nohprah 03: U Myntri Rangbah ka jylla u Conrad K Sangma ha ka sngi Saitjaiñ u la ïoh ban plie paidbah ïa ka shlem ba pura jong ka [24]7.ai kaba dei ka international Bussiness Process Outsourcing(BOP) company ha Technology Park Umsawli.
Kane ka BOP ka dei kaba nyngkong eh ban buh ïa ka shnat treikam jong ka ha Shillong bad ha ka thaiñ Lammih ngi hi baroh kawei.
Haba kren ha kane ka sngi u Myntri Rangbah ka jylla u la ong ba ka jingwan kane ka kompeni ha ka jylla kan long ka jingmyntoi kaba khraw eh na bynta ka lawei ki samla namar da ka jingdon jong ka kan sa lah ban ai kam ïa shibun ngut ki samla kiba la nang la stad.
U la ïathuh ruh ba kumba long mynta ki nongshnong shnong kiba don ha ka jylla ki don kumba 15 lak kiba hapoh ka rta ba 15 snem.
“Hadien 15 snem kumba 15 lak ngut kin dei kiba la nang la stad ban kiban wad kam wad jam bad dei namarkata ka jingdon kum kane ka kompni kan lah ban ïarap pynmih shibun bah ki kam kiba kum kine,” u la ong.
Shuh shuh u la ong ba na ka liang ka sorkar mynta kan phai khmat nyngkong eh sha ka Tourism bad ka Information and Technology Sector namar kin dei ki sector kiban pynïohnong ïa ka jylla la ka dei ha ka liang ka jingïoh khajna ne ha kaba ïadei bad ka jinglah ban pynmih kam thymmai.
Haba kren sha ki lad pathai khubor, u Chief Delivery Officer – India & Americas ka [24]7.ai u Animesh Jain u la ong ba kumba long mynta kane ka kompeni ka la aikam kumba 300 ngut eiei ki samla bad u ong ba la kumno kumno kumba 1,000 ngut eiei ki samla kin ai kam ha kine ki 12 bnai ban wan.
U la ong ruh ba na ka liang ka kompeni ka lap ba kiba byllai bah ki samla ka jylla ki dei kiba don ki sap kiba biang sbak ban trei ïa kane ka jaidkam namar ka jingpnah ha ka kren phareng bad ka rukom im jong ki ruh ka dei kaba ki kompeni ki donkam.
Kumban shu kdew hangne ka [24]7.ai ka dei ka kompeni kaba don ka tynrai jong ka na Carlifornia bad ha India ka don lai tylli ki ophis treikam bad kawei napdeng kita ka dei ha Shillong.