Mana ka I&B ban pynbna ïa ki kam khalai ha ki TV bad Youtube

0

Shillong, Risaw 03: Namar ka jingma ha ka pisa pilaiñ bad ka jingïadei ha ka imlang sahlang ïa ki briew, khamtam ki samla, ka tnat Information and Broadcasting mynta ka sngi ka la ai ar tylli ki jingpynbna, kawei ïa ki television channel jong ki kynhun bad ki riew shimet bad sa kawei pat ïa kito kiba pynmih khubor online bad ki rynsan OTT ha kaba ka la bthah ïa ki ba kin kiar na ka jingpynmih ïa ki jingpyntip shaphang ki site thong pisa online bad ki jingpynbna kiba ar jingmut ha kine ki site.
Ka tnat ka la ju pynmih teng ïa kum kane ka jingai jingmut ha ka 13 tarik u Jylliew, 2022 ha kaba ka la ai jingmut ïa ki kotkhubor, ki channel TV jong ki briew bad ki kynhun online bad ki rynsan pynmih khubor online ba kin kiar na ka jingpynmih ia ki jingpynbna shaphang ki rynsan thong pisa online.
Ka Sorkar ka la ïohi ba ki don ki channel TV kiba pyni ïa ki prokram ialehkai, ha ryngkat ki rynsan OTT, kiba la sdang pyni dang shen ïa ki jingpynbna jong ki rynsan thong pisa nabar ri ha ryngkat ki website khubor. ïa kine ki jingai jingmut la pynskhem da ki jingshem kiba shai kiba don ki jingpynbna jong ki rynsan thong pisa nabar ri kum ka Fairplay, PariMatch, Betway, Wolf 777 bad 1xBet.
Ha kine ki jingpynbna, ka tnat ka la ong ba ki rynsan thong pisa nabar ri mynta ki la sdang pyndonkam ïa ki website kiba pathai khubor kum ki lad ban ai jingtip shaphang ki rynsan thong pisa ha ka digital media. Ha kane, ka that ka la lap ba ki dur jong ki website pathai khubor ki ïaysriem bha ia ki rynsan thong pisa. Shuh shuh, ka tnat ka la ong ba kine ki rynsan thong pisa bad ki website pathai khubor kim dei kiba la pynrung kyrteng hapoh kano kano ka bor ha India. Kine ki website ki pynshlur ïa ka jingthong pisa bad ka jingkhalai da kaba kam ba ki dei ki khubor.
Ki jingbthah da ka tnat ki la ong ba ka jingthong pisa ka dei kaba beaiñ ha ki jaka ba bun ha India, kumta ki jingpynbna shaphang kine ki rynsan thong pisa ruh ki long kiba beaiñ. Ki jingbthah ki buh nongrim ha ki kyndon ka Consumer Protection Act 2019, Cable TV Network Regulation Act 1995 bad ka IT Rules, 2021. Ka tnat ka la ong ba kine ki jingpynbna kim ïahap bad ki kyndon bapher bapher bad ka la ai jingmut ia ki TV channel bad ki nongpynmih khubor online ba kin ym pynmih ïa ki jingpynbna shaphang ki rynsan thong pisa lane ki website ai khubor jong ki, da kaba pynkynmaw ïa ki TV channel ba ka jingiaid lait ïa kane ka lah ban wanrah ïa ka jingpynshitom. Ka tnat ka la ai jingmut ruh ïa ki nongpynmih jingpynbna ha ki lad online ba kin ym thew ïa kum kine ki jingpynbna sha ki briew ka India.
Ka tnat ka la ong ba ka jingthong pisa bad ka jingkhalai ki buh ïa ki briew ha ka jingma ha ka pisa pilaiñ bad ka jingiadei ha ka imlang sahlang, khamtam ki samla bad ki khynnah. Kumta, ka jingpynshlur ïa ki jingthong pisa lane ka jingkhalai online lane offline lyngba ki jingpynbna ka dei kaba bha ban kiar na ka bynta ka jingbha.
Ka tnat Information & Broadcasting ka la iatrei bad ka tnat Consumer Affairs ban pyllait ïa kine ki jingai jingmut.

Leave A Reply

Your email address will not be published.