Jowai Risaw 03: Hadien ba la lut ka Baibl Khasi kaba la shon ha ki snem kiba la dep la shon biang (Reprint) bad kane ka dei ka sien shon kaba lai bad la pyllait paidbah ïa ka hynnin ka sngi 02/10/2022 ha St. Theresa Liesux Cathedral Jowai Diocese da u Rev. Fr. Ferdinand Dkhar Diocesan Administrator ka Jowai Diocese, ha ka jingïadonlang ki Phadar bad ki paidriewngeit na ki Parish bapher bapher jong ka Diocese.
U Phadar Ferdinand Dkhar ha ka jingkren pyllait ïa kane ka Baibl, u ong ba ka jinglah ban shon biang bad pyllait paidbah ïa kane ka Baibl, ka long ka jingkmen ka bakhraw ïa ki paidriewngeit bad ïa ki ‘riew ieid pule Baibl. Nangta u ong kane Baibl ka kynthup ïa ki jingthoh jong ka Jutang barim bad ka Jutang kaba thymmai bad lada shim ïa ka jingheh, ka jingrben jong ka kot, ka jingsop kaba rben bad ka jingshon kaba itynnat ha ka ktien Khasi paka bad ka jingshon kaba shai kan jin da la long ka Kot kaba remdor, hynrei la die ïa ka ha ka dor kaba tat shibun bad kaba kiba duk ruh ki lah ban thied ïa ka.
U Phadar Ferdinand u pynkut ïa ka jingkren jong u da kaba ong mynta hadien ba la shon biang (reprint) bad la ïoh ïa ka Baibl, mynta ka sah ha phi ki khun baieid jong ka Balang ba phin ïa thied ïa kane ka Baibl ba phin pule bad puson ïa ka Ktien ka jong U Blei da ka jingieid da ka jingriewblei da ka jingduriap ïa ka ban ioh jinghikai bad ban tip shaphang U Jisu bad ka Ktien ka jong U Blei.
Ïa ka Baibl Khasi la pynkylla ia ka na ka Ktien tynrai sha ka ktien Khasi da u Phadar (L) Henry Fantin SDB, bad ki Nongiarap jong u kum u Phadar Silvanus Sngi Lyngdoh SDB, Professor Scripture, Monsingor Emmanuel Bard SDB, bah George Chyne, Fr. (L) Carmello Spitale SDB, kong Mary Blah bad kiwei de.
Kum ban shu pynkynmaw ïa kane ka Baibl Khasi ha kane ka sien shon kaba lai sien la plie ïa ka ha kane ka 25 tarik September 2022, ha ïingmane Cathedral jong ka Maria ka Nongïarap ki Khristan. Laitumkhrah Shillong da u Most. Rev Victor Lyngdoh D.D. Archbishop ka Jylla Niambah Shillong bad ha Jowai Diocese la plie ïa ka ha kane ka 2 tarik, mynta u bnai da u Phadar Ferdinand Dkhar Administrator ka Jowai Diocese.
