Mih pyrthei ka seng ki nongdie tiar ka ‘Khasi Travellers Sale Association’

Shillong, Risaw 03 : Ka kynhun jong ki nongdie tiar kiba ju leit shang tyrwa kylleng ki shnong ki thaw da kawei ka sur ki la thaw ïa ka synjuk ka jong ki kaba la tip kum ka ‘Khasi Travellers Sale Association’ (KTSA). Ka motto jong kane ka synjuk ka ong, “ñiewkor Ïa la Ka Kam’.
Kane ka kynhun ka kynthup naduh kiba tyrwa die jaiñ, ki tiar ilektrik, tiar shet tiaw tiew, ki soh ki pai bad kiwei kiwei. Ka jingthmu jong ki ban don noh da ka synjuk ki nongdie tiar ka long ban ai ka jingshngaiñ na bynta jong ki haba ki leit ban tyrwa tiar ha kylleng ki shong ki thaw hapoh ka jylla.
Kum ka jingpynbna paidbah ïa kane ka synjuk kaban treikam pura noh, la ïoh ban pynlong ka jingïalang ha ka sngi Nyngkong (03-10-2022) ha ka Shnong Laitpynter Synrangkaban East Khasi Hills District kaba don ruh ïa ka ophis treikam jong ka, ha kaba la don lang naduh u Bah Shiningstar Kharbani (President), Bah Shaibor Nongrum (Vice President), Bah Mykulbest L. Kynshi (General Secretary), dkhot jong ka Executive Committee bad ki nongdie tiar.
Ha kane ka sngi la ïoh ban pynher ïa ka lama jong ka Association da u President Bah Shiningstar Kharbani bad la ïoh ban pule ïa ka history lyngkot ka jingïaid lynti jong ka naduh kaba sdang jong ka jingthaw ïa kane ka association da u General Secretary u Bah Mykulbest Lyngdoh Kynshi.
Ha kane ka sngi la ïadonlang ruh u Rangbah Shnong bad Secretary Shnong ka Laitpynter Synrangkaban u Bah Manioj Kurbah bad Bah Pitles Kurbah.
Katkum ka jingïathuh u Bah Shiningstar Kharbani ba ïa kane ka association la seng ha 13 tarik Jylliew 2022 bad ïathuh ruh ba ïa kane ka association la ïoh ruh ka jingithuh na ka sorkar lyngba ka Deputy Commissioner ka East Khasi Hills District kaba la ai ka jingmynjur ïa ka jingpynrung kyrteng ha ka 17 tarik Nailur 2022.
U la ïathuh ba ka association ka la ïoh ruh ka jingbit ban tah sticker ha ki kali kiba kit ïa ki tiar bad pynbiang ruh da ki ID khnang ba kan long shngaiñ haba ki leit ban tyrwa tiar. “Ha kine ki sngi ba mynta ngi ïohi ba bun ki jingsniew kiba laiphew jait bad ban lait ka jingshah tharai sniew ha ki nongshong shnong ngi la pynbiang ruh da ki ID khnang ban pynithuh ba kidei kiba la ithuh da ka Association,” la ong u Bah Siningstar.
U la pynpaw ruh ba ka thong jong lyngba kane ka Association kan long ban kyntiew para Khasi ha ka liang ka kamai kajih bad ka jingïatylli. Ym tang ha ka liang ki nongdie tiar hynrei kane ka Association ka buh ruh hakhmat ïa ka mat treikam kata na ka bynta ban peit bad khmih ïa ka bha ka miat jong ka imlang ka sahlang.