Maham khang tala ka JSU ïa ka CHC

0

Jowai, Risaw 03: Ka Jaiñtia Student Union (JSU) Laskeiñ Block Circle ha ka miet jong ka 2 tarik kala leit ban jurip ïa ka jaka ai jingsumar sorkar ka CHC kaba don ha Laskeiñ kaba hap hapoh West Jaiñtia Hills District, ha ka jinglam khmat u President samla Dapmain Suchiang uba bat ruh kum u Publicity Secretary Central Body, ryngkat ka jingïadon lang bad ki members jong ka seng.
Kane ka jingleit jurip ka long hadien ba la ïoh ujor na ki nongshong shnong kane ka thaiñ ba ym juh don Doctor khamtam ha ka por ba don ki jingjia Accident ha por mynmiet. Kaba shitom bha lei lei ïa ki briew ki baduk khamtam kito ba sah sha jngai bad teng teng kim ban se ban shu leit noh shaduh sha Jowai tang ban ïoh ïa ka jingsumar kaba biang ban lait na ki jingsngew sih.
Ka seng ka la maham tyngeh ruh ba lada ka dang lap shuh shuh kum kine ki jingujor na ka liang jong ka seng hi kan ym shong kli kti shuh, kan leit ban khang tala noh shi syndon ïa kane ka Hospital CHC.
Kala buh ruh ka jingkyrpad ïa ka Health Department ba kan sngewbha ban shimkhia bad ban pynbiang ïa ka jingeh jong u paidbah namar ba ka dei ruh ka kamram jong ka Hospital khnang ban suk kiba duk lane kiba don kam ïa ka Emergency Treatment, la kyrpad ruh ïa ki nongtrei ban wan biang por khnang ba ki briew ba wan najan bad najngai ki shnong ruh kin ïoh ïa ka jingsumar kaba biang bad ba pura.

Leave A Reply

Your email address will not be published.