Dei ban pynbeit ïa ki kyndon ha ka jingpynbeit pud ba ar ban ym duh ki jaka ha Block I bad II: Robertjune

Shillong, Risaw 03: U President jong ka Hynñiewtrep Youth Council(HYC) u Bah Robertjune Kharjahrin u la ong ba ka sorkar jylla ka dei ban pynkylla ïa ki kyndon(term of reference) na bynta ban pynbeit pud ha ka wat kaba ar namar lada ïaid biang kum ha ka Wat ba nyngkong kan pynduhnong shibun ïa ka jylla namar kiba bun ki shnong ka jylla kan ym ïoh shuh satia khamtam eh kiba dei ha ki thaiñ Block I bad Block II.
Ha ka jingïakren ba tang bad u Mawphor u la ong ba kat kum ka kyndon ba ar ha ka jingpynbna ka sorkar la kdew shai ba ki Regional Committee kiba la thaw da ka sorkar la ong ba kin shu peit biang ban pynskhem(Cross Verify) ba ki shnong kiba kam ka jylla Meghalaya ha ki kot ki sla ba don ha ka sorkar Assam(kaba mut kaiphod 2011) khlem da lah shuh ban peit biang ba lada don ki shnong kiba kwah ban wan sha ka jylla ne ki dei ruh ki bynta jong ka jylla kiba ym shym la shah kynthup ha ka kaiphod 2011 kin dang lah ban wanphai biang sha ka jylla.
“Ka sorkar ka dei ban pynbeit ïa kane ka kyndon namar kan pynduhnong shibun ïa ka jylla bad kiba bun ruh ki shnong kin leit sha ka Assam lada na ka liang kine ki Regional Committee kin shu peit biang ban pynskhem(Cross Verify) ba kito ki shnong kiba kam ka jylla Meghalaya kat kum ka kaiphod 2011 ki dei ki bynta ka jylla jong ngi namar bun bah ki shnong kiba dei ki shnong Khasi bad ki bynta ki hima Khasi kim shah kynthup ha kane ka kaiphod. Namarkata ka sorkar ka dei ban ong ha ka kyndon ba lada don ki shnong kiba ym shym la shah kynthup ha ka kaiphod 2011 bad kiba dei ki jaka ba ïa knieh hapdeng ka Meghalaya bad Assam kin dang ïoh lad ban wan biang sha ka jylla” u la ong.
U la ong ruh ba lada ïaid kat kum kane ka kaiphod ba la aiti sha ka Assam ha u snem 2011 ka jylla kan duh ei khamtam eh ïa ki shnong kiba don ha ka thaiñ Block I bad Block II namar ha ka kaiphod la kam ba ki don tang 13 tylli ki shnong kiba dei ki jong ka jylla Meghalaya kiba la leit sha Assam katba dang shen na ka liang ki khlieh nongsynshar na ka thaiñ Block I ki ong ba ki don haduh 36 tylli ki shnong Khasi bad ha Block II ki don kumba 22 tylli ki shnong kiba kwah ban wan sha ka jylla Meghalaya “lada ïaid beit kat kum katei ka kyndon bad ka kaiphod kine ki shnong ngin duh ei” u la ong.
U la ong “Kat kum ka kaiphod 2011 ka Block I kaba ka jingheh ka jaka ka don kumba 537.54 Sq KM bad ka Block II pat ka la palat ïa ka 1000 Sq Km katba lada peit ïa ki shnong ki don tang 13 tylli kaba mut lada ka jingpynbeit pud kan dei beit tang na bynta ki 13 tylli ki shnong kiba la kam ha u 2011 kaba mut 70% ngi la duh lupa ïa ki shnong ha Block I bad Block II.”
U la ong ba lada peit na kaei kaba u Myntri Rangbah u Conrad Sangma u ong ba ka ka jingpynbeit pud kan dei beit tang ïa ki shnong kiba la kam ha ka kaiphod 2011 kaba mut kiba bun bah ki shnong kiba ka sorkar u Mukul kam shym la kynthup kan ym don shuh ka jingïakren pynbeit pud hynrei la shu rai beit ba kin dei ki jaka ka Assam.
“Namarkata, kum ka seng ngi kwah ba kane ka kyndon ka sorkar ka dei ban pynbeit biang khnang ba ka jylla kan ym duh ei shibun bah ki jaka sha ka Assam”, ong u Bah Robert.