Shillong, Naiwieng 13: U SP City, Bah Vivek Syiem, mynta ka sngi, u la lum ïa ka jingïalang jong ki nongïalam Shnong na Wahingdoh, Riatsamthiah, Jaiaw Shyiap, Jaiaw Mihngi bad Mawlai Phudmuri, ban ïaphylliew jingmut halor ka jingjyllei ki jingsniew khamtam eh u drok ha ki bynta jong ka khlaw Lawmali bad ki surok kiba don ha kane ka thaiñ.
Ha kane ka jingïalang ha kaba la don lang ruh ki Pulit jong ka ANTF, kaba dei ka kynhun ba thwet ïa ki nongkhaïi drok, la rai ban maham ïa ki paidbah ba kim bit satia ban rung kulmar nangne shakhmat sha ki bynta jong ka khlaw Lawmali bad lada lap ïano ïano yn pynshitom ïa ki katkum ka aiñ. Kane ka jingïalang ka la ong ruh ba namar kane kadei ka khlaw jong ka tnad Forest, yn phah jingthoh sha kane ka tnad treikam ba kam ker ne fencing noh ïa kane ka khlaw, khnang ban khanglad ïa ka jingrung pathar ki briew ban ïaleh ïa ki kam sniew.
Kawei pat ka rai ba la shim ha kane ka jingïalang ka long ban khanglad ïa ka jingïashongkai bad ïa dih ïa bam ha ki kali ha kapor mynmiet sha ki surok kiba don ha kane ka thaiñ. Lada lap ïa kiba kum kine, na ka liang ki Pulit kin kem bad pynshitom katkum ka aiñ.
