Shillong, Naiwieng 13 : U Myntri ka tnad Food Civil Supplies and Consumer Affairs ka sorkar jylla, Bah Comingone Ymbon ha ka sngi Nyngkong u la kyntu ïa ki paidbah nongshong shnong ka jylla ba kin pynïasoh noh ïa ka card khaw rashon bad u Aadhar khnang ban lait na ka jingshah lehthok kiba lah ban mih harukom.
Haba kren bad ki lad pathai khubor ha Shillong Press Club u Myntri u la ong, “Ka jingpynïasoh lang ïa ka card khaw rashon bad u Aadhar kan lah ban pyntreikam pura ïa ka National Food Security Act (NFSA) ha ka ri baroh kawei. Ka jingthmu ka long ruh ban pyntikna ba kito kiba ïohnong hapoh ka skim khaw rashon ki dei shisha kiba dei hok.”
La ïathuh ruh ba lada pynïasoh bad u Aadhar kan pynduh jait ïa ki card rashon thok bad kiban ïoh jingmyntoi kin dei beit tang kito kiba dei hok bad ha ka dor kaba jem bha nalor ba kan pyntikna ba ka jingtreikam kan long ha ka rukom kaba khuid ba suba.
U Myntri u la pyntip ruh ba ïa ka jingpynïasoh ïa u Aadhar bad ka card rashon lah ban leh online kumjuh ruh da kaba leit rah ïa ki kot ki sla (ki xerox kopi jong ka aadhar card jong u/ka khlieh ka iing bad ka xerox kopi jong ka bank passbook), sha ka jaka ba ju ai khaw rashon.
Ha kane ka sngi la ïoh ruh ïa ka jingpynshai na u Commissioner and Secretary ka tnad, Pravin Bakshi ryngkat ka jingdonlang kiwei kiwei ki ophisar ka tnad.
Ka tnad Food and Civil Supplies ha kane ka sngi ka la pyllait paidbah ruh ïa ka music video halor u khaw rashon ba la rwai da u Wanjop Sohkhlet ban pynsngewthuh shuh shuh ïa ki paidbah halor katei ka phang.
