Shillong, Naiwieng 13: Kskulbah North Eastern Hills University (NEHU) mynta ka Lah Sngi U Blei ka la kynjah jar bad ki Klass ki la thylli kreng kreng namar ka jingbym don ki nonghikai bad kane kala pynlong ruh ïa ki samla pule ban pep wan sha klass.
Kane ka jingkynjah bad thylli ki karma klass kadei namar ka jingïakhih ba khlem buh por jong ka Joint Action Committee (JAC) ba kynthup ki Union jong ka NEHUTA, NEHUSU bad NEHUNSA, ban pyrshah ïa ka jingleh mynthi u Vice Chancellor (VC) ka skulbah NEHU.
La sakhi ba ki samla pule bad ki nonghikai ki don hapoh NEHU hynrei kam shym la don satia ka jingshim klass namar ka JAC ka la rai ban ïaid beit ïa ka jingikhih khkem pud sngi.
Lah ban ong ba wat ki samla pule ka skulbah NEHU ruh ki kyrshan ïa ka rai jong ka JAC ban ïakhih khlem buh por.
Naka liang u Chairman ka JAC u Prof Lakhon Kma ula ong ba kane ka jingïakhih ka long kaba jop bad ka JAC kan ïai bteng ïa kane ka jingïakhih katba u VC um pat weng ïa u Rohit Prasad uba la shah thung kum Technical Officer/Senior Consultant.
U Prof Kma ula ong “Nalor ka jingdawa weng kam ïa u Rohit Prasda, ka JAC ka dawa ruh ban pynurlong ïa ki mat jingdawa ki samla pule bad ki nonghikai ka skulbah”.
Ula kynnoh ruh ba une u VC u wan hangne ha NEHU tang ban lehkmen ïa ki jingmyntoi ba u ïoh na kane ka skulbah bad kane ka pynpaw shai ba une u VC ba mynta um pat ibit ban shong ha katei ka shuki kum u VC.
Halor kane ka jingïakhih khlem buh por, na ka liang ka JAC ka la rai ban ïai bteng tad haduh u VC u khot ïa ka jingïakren bad kan ïai bteng tad haduh ba la pynurlong ïa ki jingdawa jong baroh ki kynhun kiba don haka JAC.
