Shillong, Naiwieng 13: U Joint Secretary ka Heal and Family Welfare, u TG Momin, ha ka kyrwoh ba la phah mynta ka sngi, u la ong ba ka tnad ka koit ka khiah ka la shimkhia halor ki jingeh jong ki ASHA, da kaba ka sorkar ka la pyllait bun ka pisa kaba dei na ka bynta ka jingsiew jong ki.
Kawei na kine lad ba ka sorkar ka la shimkhia kadei ka jingpynmih ia ka Mobile App ba la ai kyrteng ASHA First kaba dei na ka bynta ka jingsiew kaba suk sha baroh ki ASHA jong ka jylla. Nangta ka la pynmih ruh ïa kiwei pat ki jingai ne ki jingsiew ne ki incentive, kiba lada ki ASHA ki trei smat bad trei shitom ki lah ban kot ka jingsiew haduh 7 hajar ne 8 hajar tyngka shi bnai.
Ha kane ka kyrwoh u Momin, u la ong ruh ba ka sorkar naduh u bnai Risaw 2022, ka la pyllait ïa ka pisa kaba 31.89 klur tyngka kaba dei ka jingsiew bapher bapher sha ki ASHA ha kine ki 12 bnai baladep. Nangta kumba 34.50 klur tyngka ha kine 18 bnai baladep.
Shuh shuh u Momin, u la ong ba ka sorkar ka la siew ruh ïa ka Meghalaya Maternity Benefit Scheme bad ka Meghalaya ASHA Benifit Scheme kaba khlem siew naduh ka snem 2013. Ïa kane la siew ha ka snem 2021- 2022 ha ka jinglut kaba 53 Klur tyngka.
Ka tnad ka koit ka khiah, ka kubur ruh ba ki ASHA kidei ki bynta ba kongsan jong ka tnad ka koit ka khiah bad ym lah ban kheiñ sting ïa ka jingtreikam jong ki. U la ong ba kane ka jingsangeh treikam jong ki kan ktah shibun ïa ka jingtreikam ka tnad ka koit ka khiah bad ka jingpynkylla ïa ka jingtreikam kan shimpor na ka bynta ka jingtreikam kaba khambha.
