Shillong, Naiwieng 13: Ka Sorkar Jylla lyngba ka tnat Arts and Culture ka la pynbna ban pynlong ïa ka tamasa Tri Hills Ensemble ha ka 24 bad 25 tarik mynta u bnai ha State Central Library.
ïa kane la pynbna da u Commissioner and Secretary ka tnat Arts and Culture ka sorkar Jylla u Bah FR Kharkongor ha kaba ula ïathuh ba ïa kane ka Tamasa la pynlong kum shi bynta na ka jingrakhe ïa ka Janjatiya Gaurav Divas ha baroh kawei ka Ri India ka ban sdang naduh ka 15 tarik mynta u bnai.
Lah ban kdew ba ka sorkar pdeng ha ka 15 tarik Naiwieng 2021, ka la rai ban rakhe ïa ka Janjatiya Gaurav Divas na ka bynta ban kynmaw burom ïa u Birsam Munda, u nongïaleh laitluid ki riewlum.
Haba kren sha ki lad pathai khubor u Commissioner and Secretary ka tnat Arts and Culture ka sorkar Jylla u Bah FR Kharkongor ula ïathuh ba kane ka tamasa Tri Hills Ensemble ka dei ka tamasa ban pyninam ïa ki jingriew spah ki jaidbynriew riewlum ka Ri India.
U Bah Kharkongor ula ïathuh ruh ba ha kane ka tamasa ka sorkar kan ai jingithuh kyrpang ïa ki 6 tylli ki shnong hapoh kane ka jylla kiba dang pynneh pynsah ia la ka lariti lyngba ki sap kyrpang ba ki don.
“Haka 15 tarik mynta u bnai ka Meghalaya kan ïasnoh kti lang bad baroh ki Jylla hapoh ka Ri India ban rakhe ïa ka Janjatiya Gaurav Divas ban ban pyninam ïa ki jingriew spah bad ka jinglong kyrpang ki jaidbynriew riewlum” la ong u Bah Kharkongor.
U Bah Kharkongor ula pyntip ba ha kane ka tamasa ka ban neh haduh shitaiew, ka tnat Arts and Culture kan pynkup burom ïa 6 tylli ki shnong ba kynthup ka shnong jong ka Meghalaya kiba dang ïai pynneh ïa ka riti dustur, la ka dei haka put ka tem, ka thaiñ tynrai bad kiwei kiwei.
