Shillong, Naiwieng 13 : Ki bor pynïaid District ka East Khasi Hills, ki la khang shipor ïa ka jingïaid kamai ki maxi cab SPTS sha ki thaiñ Khyndailad bad Motphran, kum ka jingpyrshang ba shitaiew ban peit ïa ka jinglong jingman ka jingdheng kali hapoh ka Nongbah.
Kane ka hukum ka la sdang treikam naduh mynta ka Lah Sngi U Blei bad la pyntip ïa ka, da ki nongniah jong ki kali maxi cab kiba la leit ïakynduh ia u Chief Executive Officer (CEO) ka Shillong Municipal Board (SMB) ban pan jingshai ïa kane ka jingkhang kamai ïa ki sha Khyndai Lad bad Motphran.
Ki la pyntip ba u CEO ula pynshai ba kane ka dei tang ka jingpyrshang ban peit ïa ka jinglong jingman ka dheng kali ha sor Shillong. La ïathuh ruh ba u CEO u pyntip ba shen un sa lum ïa ka jingïalang bad ki nongpynïaid ïa ki kali maxi cab ban ïapyrkhat ïa ka jingthmu ban pynïaid da ka rukom kamai ba thymmai ïa ki maxi cab.
Ki nongñiah kali kila pynpaw ïa ka jingsngewdiaw halor kane ka hukum ba syndet syndet bad ong ba kane kan sa ktah jur ïa ka kamai jong ki khamtam ba ka Khyndailad bad Motphrah ka dei u klongsnam jong baroh kiba kamai kali namar baroh ki paidbah naduh ki nongshong ïew, ki nongwan ïew, ki samla pule, wat ki nongtrei sorkar ruh ki shim kali na kine artylli ki jaka.
Haba kylli, ki nongñiah maxi cab ki la pynpaw ba kim nang satia ban ong eiei halor kane ka hukum ka Sorkar bad kin ap ïa ka rai jong ki nongpynïaid ïa ki maxi cab ki ban sa ïakynduh shen ïa u CEO ka SMB.
Ki don ruh katto katne ngut ki nongñiah kiba pynpaw ba kan bha ban sangeh kamai shwa shipor tad haduh ba ka Sorkar ka la shim da kiwei pat ki rai ban pynïaid ïa ki kali kamai.
Haba ïakren bad katto katne ki paidbah haki thaiñ Khyndai Lad bad Motphran, kila pynpaw ba kane ka jingleh jong ka Sorkar kan sa ktah bha ïaki ba duk, lada ym shah shuh ïa ki maxi cab lane ïa ki bos ban kamai sha kine ki thaiñ.
“Ngi ba sah sha ki thain Nongrah, Nongmynsong bad Umpling, ngin shem jingeh bha namar ka jingkamai ki maxi cab bad ki bos ka ïarap bha ïa ngi ha ka liang ka bai kali bad ka bai kit tiar namar ka bai kali ka duna haba ïa nujor bad ki Taksi” ong ki longkmie ba die jhur ha Khyndailad bad Motphran.
Ki paidbah ki pynksan ba kala donkam shisha ïa ka sorkar ban wad ki lad lynti kumno ban tehlakam ïa ka jingdheng kali ha Shillong hynrei ki la kyntu ruh ba, kano kano ka rai ba ki shim kam dei ban ktah ïa u paidbah khamtam kito kiba kamai kyndoi jakpoh.
Kila kyntu ruh ïa ka sorkar ba kan khmih lang halor ka jingrem palat ka bai Taksi ha nongbah Shillong.
