Shillong, Naiwieng 13 : Ka rynsan ka la biang pura ïa ka Jylla Meghalaya ba kan pynlong ïa ka Tamasa Shillong Cherry Blossom 2023 bad wat ki surok bad ki lynti ïaid jong kane ka Nongbah, ki la kup ïa ki rong pink bad rong lieh jong ki syntiew dieng cherry kiba la phuh ha kat shaba ïaid.
Ki nongshangkai pyrthei na ka Ri bad nabar ri ruh kumjuh ki la phaikhat biang sa shisien sha kane ka tamasa lehkmen jong ka Jylla bad ka mariang lem bad ka kolshor bad ka put ka tem ha ryngkat bad ki kyrteng ba pawnam ha ka karkhana ka put ka tem jong ka pyrthei.
Ha ka jingïakren bad ki lad pathai khubor dang shen, u Myntri ka Tnad Jngohkai Bah Paul Lyngdoh ula ong “Kin don haduh 30,000 ngut ki nongwan kai sha kane ka tamasa manla ka sngi kaba pyni ba haduh ba kut jong kane ka tamasa, kin kot haduh ka shi lak ngut. Haduh 90% na kine ki nongwankai la khmih lynti ba kin dei ki nongshangkai kiba nabar, kynthup kiba napoh ka ri bad na bar ri ruh kumjuh”.
Kane ka tamasa kan don ïa shibun ki jingpyn byrngia naduh ki jingïakop bapher bapher ba kynthup ïa ki jingïakop thei bhabriew, ka jingïakop rwai choir, ïadro dur, ïakop rwai karaoke, ka ferris wheel bad kiwei kiwei. ïa kane ka tamasa yn pynlong ha madan Kurkalong, Bhoirymbong, Ri-Bhoi District naduh ka 17 tarik Naiwieng haduh ka 19 tarik Naiwieng.
Ha kane ka kynti, wat la ka aktress ka Bollywood Nora Fatehi kan ym lah shuh ban wan ban ïadonlang ha kane ka tamasa ban peit da la ki jong ki khmat ïa u nongrwai ba pawnam na America u Ne-yo u ban rwai ruh ïa ka jingrwai ba pawnam jong u kaba ai kyrteng“Let me Love you”.
Ki duhalia ki ban kiew ha ka rynsan ha ka sngi sdang jong ka tamasa kata ha ka 17 tarik ki kynthup ia– Sanam, Hybrid Theory, SURL, Kenny Musik, 4th Element, The Band Phantasm, DBRYN, Gwyneth, Dalariti, CYCO, Aminio, Dr Legend, Chevinia.
Ki duhali kiban pynshongshit ïa u paidbah ha ka sngi ba-ar ki kynthup ïa u NE-YO, Meba Ofilia, Pink Panda, Snow White, Rahul Rajkhowa, Street Stories – Banjop, Empirical Tribe – Tenny, Zethan, Ricaa Stella, Banker Kharkongor.
Ka sngi ba khatduh kan sakhi ia ka jingkiew rynsan jong u nongrwai barim ka Boyzone Ronan Keating, Jonas Blue, Lou Majaw, Blue Temptation, Da Minot, Nokpante, Rhem, Favian, Wanjop Sohkhlet, Banrap, Youngg Nate, Meban, Lamphrang, Toshan.
