Shillong, Naiwieng 13 : U nongïalam ka Liang Pyrshah ha KHADC, Bah Titos W Chyne ha ka sngi Nyngkong u la ong ba baroh ki khyrdop lum khajna beain ki la shah khang lut ha ka por ba ma u u bat kum u Chief Executive Member.
“Ha ka por jongnga, baroh ki khyrdop lum khajna beain la phah khang khyrdep lut bad dei tang kiba da ïoh jingbit kiba plie,” ong u Bah Titos haba kren bad ki lad pathai khubor.
Utei u CEM barim ka KHADC u la ong ruh ba um pat kwah satia ban sei pyrthei ïa ka daw ba ka EC ba ïalam ma u ban ym khang ïa kawei ka khyrdop ha Diengpasoh.
“Baroh ki khyrdop kiba don ha West Khasi Hills, Ri Bhoi lait noh tang kawei ha Diengpasoh kaba ngi khlem khang. Balei na kaei ka daw, don ka daw ha lyndet kaba ngam kwah ba pyllait mynta,” u la ong.
Nalorkata, u ong ruh ba ha katei ka por ha Mawiong ym don khyrdop, ha West Khasi Hills baroh la khang, kumjuh ha Kynshi ne Mairang.
Shuh shuh haba kdew ïa ka jingkren jong u CEM ba mynta, Bah Pynïaid Sing Syiem, u Bah Titos u la ong, “Watla u CEM u la kdew ïaka kyrteng jongnga bad ong ïa u General Secretary ban leit kylli na u CEM ba rim hynrei nga ïohi ruh ïa ka jingkren jong u nongïalam ba rim ka Liang Pyrshah ba u la kynnoh ba ka la jia ha ka por jongnga ruh kum u CEM bad ba nga khlem leh ei ei. Kumta nga kwah ban kylli ïa u ha ka por ba u don ha ka liang pyrshah ha kato ka por balei um sei ïa kane ka jingkylli bad balei u sngap jar. Ha ka jingshisha, naduh katei ka por nga la la leh.”
