Shillong, Naiwieng 13 : U Nongialam ka Liang Pyrshah ha KHADC u bah Titosstarwell Chyne mynta ka Lah Sngi u Blei u la ong ba un ïakren bad ka Exececutice Committee (EC) ban pynthikna ba ka jingphiah ïa ki Constituency ka dei ban dep shwa ka election MDC ka ban long ha u snem ban wan.
“ Ngan sa ïakern bad ka EC ba ka Delimitation Committee ka dei ban don ka por ban pyndep ïa ka jingphiah ïa ki constituency bad ai ïa ka kaiphod ha ka por kaba biang” ong u bah Titos.
Halor ka jingthaw ïa ka Delimitation Committee une u CEM ba rim ka KHADC u la ong kaba nyngkong eh ka long ka jingpynkhreh ïa ka jingthmu ban wanrah ïa ka jingpynkylla ïa ka Khyrnit kaba Hynriew jongka Riti Synshar ka ri. Namar lada don ka jingpynkylla kawei na ki mat ka dei ka jingkyntiew ïa ka jingdon ki MDC hapoh ka ïing Dorbar Thawaiñ KHADC. Kumta na kata ka daw la thaw ïa kane ka Delimitation Committee.Kaba ar pat wat lada ym pat don ka jingpynkylla hynrei kane ka Committee kan phiah ïaki constituency ban pynïaryngkat ïa ka jingbun briew namar kumba long mynta ki don ki Constituency kiba ki nongthep vote ki don haduh 50,000 vote ki don pat kiba tang 20,000 vote kumta lyngba kane ka Committee kan ïaleh ban pynïaryngkat noh ïa ka jingdon ki nongthep vote jong man la ki constituency”.
Ka shong ruh ha ka EC ban shim ïa ka rai katno ka ai por ia ka Delimitation Committee ban pyndep ïa kane ka kam.
U la ong ruh ba um tharai ba kane ka jingleh kan shim por bad ban hap ban pynjlan ïa ka samoi jongka ïing Dorbar namar tang shu dep phiah bad ïoh ïa ka jingpynskhem lah ban leh ïa kane wat hapoh ka shibnai ne ar bnai ruh.
