Shillong, Naiwieng 13 : U President ka UDP Bah Metbah Lyngdoh ha ka sngi Nyngkong u la ong ba ka Shella kan ïai bteng beit kum ka ktem UDP wat hadien ba u MDC ka party Bah Teinwell Dkhar ba la bat teng ruh kum u CEM ka KHADC, u la pynbna ba un ym ïakhun shuh ïa ka elekshon MDC kaban wan.
“Ki kam ba bha ba la leh da u MDC kadei kawei na ki daw kaba ki paidbah kin pynjop biang ïa ka UDP. Ngin pyntikna ba ngin sa ïoh ïa ki kyrtong kiban trei na ka bynta ka bha ka miat jong ki paidbah bad ngim don jingartatien ei ei haba ïadei lei lei bad ka Shella constituency,” u la ong.
Nalorkata, u la ïathuh ruh ba dei u Bah Teinwell hi u by kwah shuh ban ïakhun watla na ka party ki kwah eh ba un dang ïai bteng ban aireng ha ka elekshon ban wan. Kumta, u ong ruh ba ki ieh mynta ha ka jingstad jong ka Shella Circle ban leh ïa kaba donkam bad shim ïa ka rai halor katei ka bynta.
