Dei ban shna phlim ruh halor ka politik Meghalaya – Patricia Mukhim

Shillong, Naiwieng 13 : Ka Padma Shri Patricia Mukhim ka la kyntu ïa ki nongshna phlim ba kidei ban shna phlim ruh halor ka saiñpyrthei namar ki phlim ki dei ki bynta kiba khlaiñbor bha ban pynshai bad pynsngewthuh ïa ki paidbah ïa ka jingdonkam ka jingkylla.
“Nga kwah ban kyntu ïa ki nongshna phlim na kane ka jylla bad na kiwei ki jylla ruh kumjuh ba kin shna katto katne ki phlim halor ka saiñpyrthei namar donkam shisha ban pynkylla noh ïa kane ka bynta,” ka la ong haba kren kum ka Kongsan ha ka jingpynhap pyrda ïa ka Kelvin Cinma Hall Festival kaba lai sngi kaba long ha nongbah Shillong naduh ka 9-11tarik mynta u bnai.
Nalorkata, ka ong ruh ba kane ka long ka sienjam khnang ba ki paidbah kin ym jied ïa ki briew ki bym pat biang man la ka san snem.
“Nga tip phi la lah shibun bha, hynrei la kumno kumno ha ka tamasa kaban sa long biang ngin ïohi ïa ki phlim kiba kham pher kiba lah ban pynkhynñiuh ïa baroh. Ki sawdong sawkun mynta ki don ha ka jingma, kumta donkam ki phlim kiban pyni ïa ki kam tih dewiong, nangta kiban pyni ïa ka jingtih maw, tih shyiap bad ka jingtih jingkhlong kaba harukom kaba pyni ba ngim patiaw shuh ïano ïano ruh,” la bynrap biang ka Kong Patricia kaba dei ruh ka ha kajuh ka por ka Editor Shillong Times.
Ha kane ka festival kaba la pynlong da ka jingtreilang bad ka Fraternity Art Cine Entertainment Shillong la donlang ruh ka Rima Das, ka nongshna phlim ba pawnam ha ka Ri kum ka Symbud Kongsan.
Ha ka sngi kut, ka la don ruh ka jingpyni paidbah ïa ka phlim ‘Onaatah : Of the Earth jong u Bah Pradip Kurbah kaba la pyni kum ka jingkynmaw burom ïa u (L) Enshon Angelus Lamare, (L) Destina Mawrie bad (L) Renauldus Kharbuli.
La pynphuh ïa ka tamasa da ka jingsam ïa ki khusnam sha ki lai ngut ki nongshna phlim na ka thain shatei lam-mihngi jong ka Ri kiba la ïohpdïang ïa ka 69th National Film Awards. Kitei ki kynthup ïa ka Monjul Baruah na bynta ka phlim ‘Anur’ na ka thup ‘Best Assamese Film’; u Biswajeet Bora na bynta ka phlim, ‘Boomba Ride’ na ka thup‘Best Mishing Film’ bad ka Romi Meitei na bynta ka phlim ‘Eikhoigi Yum’ na ka athup ‘Best Manipuri film.
Ka la don ruh ka jingpynkup burom ïa ka kynhun jong ka phlim ‘Iewduh’ bad pynbud pat sa ka jingpyni ïa ka phlim lyngkot jong u Bah Pradip Kurbah ba ai kyrteng ka ‘Path’.
Hadien kane ka la don ruh ka jingsam ïa ki khusnam sha ki nongjop ha ki thup bapher bapher. Kine ki kynthup ïa ka
Reema Maya bad Rohan Kapoor kum ki Best Editor jong ka phlim ‘Nocturnal Burger’, nangta u Bah El Dhar pat u la ïoh ïa ka khusnam Best Cinematographer na bynta ka phlim – Ka Pateng, u Sukanya Bhawal ha ka thup Best Sound Design na bynta ka phlim Ek Divas), u samla Pynkmen Lyngdoh Mawnai ïa ka khusnam Best Actor ha ka liang ki shynrang na ka phlim ka Pateng bad Jyllop, ka Milo Sunka pat kum ka Best Actor ha ka liang ki kynthei ha ka phlim Nocturnal Burger, bud pat sa u Sankirang Khongwir ïa ka khusnam Best Director na bynta ka phlim Ka Pateng, ka Akanshya Bhagabati ïa ka khusnam Best Film na bynta ka phlim Son of the Soil.
Ka la don ruh ka khusnam ba thymmai ba tip kum ka Kelvin Cine Writers Award ban ithuh ïa ka jingnoh synñiang ki nongthoh ïa ka khana na bynta ban kyntiew ïa ka kam shna phlim h Meghalaya. Ïa kane ka khusnam la ïoh da ka Paulami Dutta, kaba la ïatrei lang bad u Pradip Kurbah na bynta ka phlim kaba la ïoh ruh ïa ka National Award, ka ‘Ri: Homeland of Uncertainty’, ‘Onaatah: Of the Earth’, ‘Iewduh’ (The Market) bad ka phlim‘Path’, nalor kiwei kiwei.
Ha ka sngi kut la pyni kyrpang ruh ïa ka phlim ba la pynbit pynbiang da u Bah Raphael Warjri kaba la ai kyrteng – Apot.
Lah ruh ban kdew hangne ba ka Fraternity Art Cine Entertainment Shillong ka dei ka kynhun tang jong ki nongshna phlim kiba la paw bad kiba shna ïa ki phlim kiba kynssai kiba la ïoh ïa ka jingithuh ym tang ha ka Ri hynrei wat ha ki lympung heh jong ka pyrthei.