Da ka jingdon jong ka Girl’s Hostel kan long ka jingkyrkhu ïa ki khun kynthei: Renikton

Mawkyrwat, ‘Naiwieng 13: U Nongmihkhmat jong ka Mawkyrwat Constituency bad kum u nongaibuid jong ka tnad Social Welfare ka Sorkar Meghalaya, u bah Renikton Lyngdoh Tongkhar uba long ruh ha kajuh ka por kum u kongsan mynta ka sngi ka 13 tarik ‘Naiwieng, 2023 u la ïoh ban plie bad ot ribon ïa ka Girl’s Hostel kaba don ha Mawkyrwat, South West Khasi Hills District.
Lah ban kdew ba kane ka Girl’s Hostel ka hap hapoh ka Social Welfare Department jong ka Sorkar Meghalaya bad la bei tyngka lyngba ka skhim Article 275 (1) jong ka Constitution ka Ri India, Ministry ka Tribal Affairs ka Sorkar India. Shuh shuh ïa kane ka projek la pyntrei da ka District Rural Development Agency (DRDA), South West Khasi Hills kaba ha ka jingmang pisa kaba T. 2.50 klur tyngka kaba don ha ka ïa ki 13 tylli ki kamra thiah bad kiwei de ki kamra ba donkam bad ïa kane ka Girl’s Hostel ynsa aiti ban pynïaid da ka Balang Presbyterian Mawkyrwat.
U bah Renikton Lyngdoh Tongkhar, haba kren ha ka jingïalang u la pynpaw ka jingïaroh shikatdei eh ïa ka Social Welfare Department kaba la ai ka jingshakri kaba kham bha ïa ki paidbah ha kylleng ki jaka bad kumjuh ruh ha ka South West Khasi Hills District na ka bynta kiba donkam ki lad jingïarap ha kiba bun ki liang ïa kaba mynta ka sngi ka la ïoh ban plie ïa ka Girls’ Hostel bad kumjuh ruh ka ju ai jingkyrshan ïa ka Hope Orphanage bad u don ruh ka jingkyrmen ba lyngba ka jingai jingkyrshan na ka District Administration, South West Khasi Hills District ynsa lah ruh ban buh sa ïa ka Rehabilitation Centre na ka bynta ban peit bad khmih ïa kito ki briew kiba la ngop ha ka jingdih ïa u drok.
Ha kajuh ka por, u bah Renikton u la ai ruh ka jingkhublei kaba kyrpang na ka bynta ka Balang Presbyterian Mawkyrwat kaba la noh synñiang shibun eh ha kaba ïa dei bad ka jaka ban shna ïa ka Girls’ Hostel bad lyngba ka jingdon ïa kane ka hostel kan long da shisha ka jingïarap bad jingkyrkhu na ka bynta ki khun kynthei kiba donkam khamtam eh ïa ki khynnah skul kiba dei na ki jaka bad ki shnong kiba kham pajih. Ha ka jingkren jong u, u la ai ruh ka jingïaroh ïa u nongpyntrei namar ka jinglah jong u ban pyndep ha ka por kaba biang eh ha kaba u la pyndep kham ha shwa ïa ka por ba la buh.
Haba bynrap shuh shuh ïa ka jingkren, u la ong ba ki don shibun bah ki kam pynroi kiba la wanrah da ka sorkar ha ki jaka bapher bapher hynrei lymda ymdon ka jingïatreilang, ka jingïasnohkitlang bad ka jingkyrshan na ki shnong ki thaw, ki seng bapher bapher bad na ki nongtrei mon sngewbha ym lah da lei lei ban pyntyllun ïa ki kam kham shakhmat, namar ka jingïatreilang ka long kaba donkam eh.
U bah Tableland Lyngwa, IAS, Deputy Commissioner jong ka South West Khasi Hills District, ha ka jingkren jong u pat u la ong ba tang ka sorkar marwei kam lah ban pyndep ïa ki kam kiba bun hynrei ka donkam ïa ki paid nongshong shnong, kiba kynthup ïa ki nongïalam shnong, ki NGOs, bad ki nongïalam Balang ruh. Kumta ha kaba ïa dei bad kane ka jingtei ïa ka Girls’ Hostel ka la long shisha ka jingjop namar ka don ka jingïatreilang naduh u nongmihkhmat bad baroh kiba la don bynta ban pynurlong ïa kane ka projek kaba heh.
Ha ka jingkren jong u, u la ong ruh ba ka jingthmu jong kane ka jingtei ka long ban ai jaka sah shi por ïa kito ki khun kynthei ba katba kita kiba sah hangne ki dei tang kito ki dang don ki kam ki jam hapoh ka thaiñ Mawkyrwat, kawei pat ban ai jaka sah ruh ïa ki briew kiba sah kham pajih na ka Mawkyrwat khamtam eh kito kiba leit skul bad kiba wan na ki longïing kiba kham duna kiba don jaka sah kiba biang. Namarkata, kyrmen ba kane ka Girls’ Hostel kan ai ka jingshakri kaba kham bha na ka bynta kito ki briew kiba donkam shisha ïa ki jingïarap bad ka ban long ruh ka shlem ka ban tei bad kyrsiew thiah ïa ki briew ha ka ban kyntiew ïa ki jingmut jingpyrkhat ha ka lynti kaba bha bad ka jingnang jingstad ruh.
U la ong ruh ba kaba kongsan ka long ban ïatei iwei ïa iwei pat ha ka longbriew manbriew, ka imlang ka sahlang khnang ba kita ki jingsniew kiba ker sawdong ïa ngi kin nym lah ban ïalam bakla. “Lada ka lawei ka sdang na ki jingsniew, kane ka pyrthei jong ngi kan sa tap tang da u lyoh uba dum bad u lyoh jong ka jingduh jingkyrmen”, ong u bah Lyngwa. Kumta ka long kaba donkam ban seng nongrim lypa ïa ki khun ki kti ha ka lynti kaba dei khnang ba ka lawei jong ki kan long kaba phyrnai.
Ha kajuh hi ka sngi, u Deputy Commissioner, South West Khasi Hills District, Mawkyrwat, u bah Tableland Lyngwa, IAS u la aiti ïa ka syrnod (Certificate) jong ka Girls’ Hostel sha ka Social Welfare Department.
Kham hashwa, u bah L.T. Tariang, MCS, Additional Deputy Commissioner bad kum u Project Director jong ka DRDA, South West Khasi Hills District u la pynsngew ïa ki katto katne ki mat kiba ïa dei bad kane ka project. Kiwei de kiba la ai jingkren ki long ka Director jong ka tnad Social Welfare Department, ka kong C.D. Lyngwa, MCS, u bah R.R. Lyngkhoi, Myntri Shnong Mawkyrwat bad u bah E. Tariang, District Social Welfare Officer, South west Khasi Hills District u la ai ki kyntien khublei.