Ha surok hap mih ki ASHA bym kheiñ snep ka sorkar ïa ka jingdawa

Nongstoiñ, Naiwieng 13: Namar ka jingbym kheiñ snep jong ka sorkar, ïa ka jingdawa jong ki ASHA ban siew da ka tulop kaba biang ïa ka jingtrei jong ki, ha ka lah sngi u Blei ka synjuk jong ki ASHA jong ka West Khasi Hills, kaba la tip kum ka West Khasi Hills ASHA Association ha ryngkat ka jingïadonlang jong ki nongïalam ka Meghalaya ASHA Workers Union kaba dei ka seng kmie na Shillong, kim banse ban mih ha surok ban pynlong da ka jingïaid proseshon ban pynsngew sha ka sorkar ba kim lah ban trei khlem ka bainong kaba biang, namar ba ka jingtrei ka long kaba khia haduh katta.
Ïa katei ka jingïaid proseshon la sdang na phyllaw jong ka Mother’s and Children Hospital Upper New Nongstoiñ, da kaba ïaid lyngba ka pdeng sor Nongstoiñ sha Ladweitang bad pynkut pat ha Maket complex kaba hakhmat ïew Nongstoiñ.
Haba la poi ha katei ka jaka la sdang ïa ka jingïalang paitbah, ha kaba la pynïaid da ka kong Oiñsinora Kharbani bad la ïoh ïa ka jingkren na ka kong Merryjune Marsing President jong ka Meghalaya ASHA Workers Union.
Katei ka nongïalam ka Union haba ai jingpynshai paitbah, ka la ong ba ka jingmih jong ki ASHA jong ka West Khasi Hills ban mih ha surok ban pynlong ïa ka jingïaid paitbah, ka dei namar ha ki bnai ba la dep ki nongïalam ka Meghalaya ASHA Worker Union, ki la leit ban pynsngew ha ka Myntri ka tnad ka koit ka khia ïa ki jingdawa, ha kaba ka la ong ba kan sa ïakren ïa katei ka jingdawa jong ki bad u Myntri Rangbah ka jylla.
Hynrei hadien ba ka la leit ban pynlong jingïalang bad u Myntri Rangbah, ka jubab ba ka la ai sha ki ASHA ka long ba ka samoi treikam jong ki ASHA ka dei tang ar snem. Nalor kata katei ka nongïalam jong ka Union ka la ong ba lada ka samoi treikam jong ki ASHA ka long tang ar snem, ka ong Ampareen ka dei ban phah copy mardor ASHA ïa kitei ki kyndon treikam sha ka Union khnang ba kan tip kumno kin trei kam.
Ka la ong ruh ba kaba sngew phylla ka long ba katei ka jingkren jong ka Myntri, kam ïahap satia ban ki kyndon ba la la pynbna da ka National Health Mission, kaba la ong ba kino kino ki ASHA kiba la trei haduh shiphew snem hadien ba ki la shong thait na ka kam, ka NHM kan ai ïa ka song jingïarap pisa kaba arphew hajar tyngka kawei pa kawei ka ASHA.
Nalor kata katei ka nongïalam ki ASHA ka la ther tyngeh ruh ïa ka jingbym kheiñ snep jong ka sorkar, da kaba ong ba ki ASHA ki dei tang ki nongtrei mon sngewbha. Ka la dawa ruh na ka sorkar ba lada ka ñiew ba ki ASHA ki dei tang ki nongtrei mon sngewbha, ka dei ban ai da ki syrnod kiba shai ba lada ki shong kali haba ki leit ban ïarap ïa ki longkmie kiba armet haba ki shitom bad haba ki leit sha ki kam ba la bynshet da ka sorkar kin ïoh ban shong ei ha ki kali khlem da siew pisa.
Nalor kata ka la ong ba lada ki leit ban shim khaw, shini, sabon, mluh bad kiwei kiwei ki jingdonkam na ki dukan, kin shu pyni da ka syrnod ba la ai da ka sorkar ba kim don kam ban siew pisa.
Ka la ong ruh ba lada ki dei shisha ki nogntrei mon sngewbha haba kip hah skul ïa ki khun ruh kim donkam ban siew bai skul namar ka sorekar ka dei ban siew. Ka la ther tyngeh ruh ba ka sorkar jylla haduh mynta ka dang kheiñ troiñ bad ka dang ñiew ba ki ASHA ki dei tang ki jaka bret ñiut.
Kiwei pat ki longkmie kiba la ai jingkren ki la ong ba katba ka sorkar kam pat ai ka jubab kaba lah ban pynhun ïa ki ASHA, kin bteng ïa ka jingsangeh treikam bad katba ka dang sngap mynthi kin ym mih na kii rympei ïing jong ki ban pyndep ïa ka kamram kumba la bynshet da ka sorkar.
Nalor kata ki la ong ba lada ka sorkar kam patiaw kim banse ban mih biang sha surok bad ban pynlong da ka jingïakhih kaba kham jur kampher wat lada kan poi haduh u pud jong ka jingïap thngan ruh. Namar ka kam ka la khia palat katba ka jingioh ha ka shi sngi ka long tang kumba 66 tyngka ei ei, hato kumno kin im.