Maham ka KSU-EJHD lada shah khang lynti ïa kiba mut leit sha Public hearing ha Lum Syrman

Khliehriat Naitung 28: Ka Khasi Students Union East Jaiñtia Hills District Unit hapoh ka jingïalam u General Secretary, u Bah K. S. Suchiang, mynta ka sngi ka la leit ïakynduh bad buh ruh da ka jingthoh hakhmat u Deputy Commissioner ka East Jaiñtia Hills District bad ruh ha ophis u Superintendent of Police East Jaiñtia Hills District, ha kane ka jingïakynduh ïa ki khlieh jong ka district, ka seng ka la pynpaw ka jingsngewkhia halor ka kynrum kynram ha kaba ïadei bad ki public hearing bad kum ka jingmaham, ka seng ka la ong ruh ba ha kane ka public hearing kaba yn pynlong ha ka 31 tarik kam dei shuh ban don ka jingshah khang lynti ïa ki briew kiba mut ban leit shim bynta ha ka public hearing ha Lum Syrman.
“Ka jingpakhang lynti da ki maw kiba heh bad ki dieng bad da kaba khlong nala ba heh ha lynti ïaid ban khang lynti ïa ki nongwan shim bynta ha ka hearing ka dei ka lynti bym dei bad kaba beaiñ, ka seng ka pynrem jur ïa kum kine ki jingleh, lah long pynban kumba dei ka hearing jong shimet ym dei shuh public hearing jong ki paidbah. Ha ka 31 tarik mynta u bnai naitung 2026, kaba dei ka sngi thohdieng kan don ka public hearing halor ka juh ka project propose Limestone mining jong ka Shree Cement ha Lum Syrman ha Shnongrim hapoh Elaka Nongkhlieh, ki bor synshar district bad ki bor pulit ki dei ban tehlakam bha bad kim dei ban ailad ba kine kin jia biang kumjuh kumba la jia mynshwa,” ong u nongïalam ka KSU-EJHD.
Ka seng ka maham ruh ba lada jia biang kum kumjuh kumba la jia ha ka public hearing kaba nyngkong ba pynlong ïa ka public hearing na ka bynta ka Setup Plant bad kaba la jia ruh ha ka public hearing kaba ar kaba dei na ka bynta ka Limestone mining project, ka seng kan shim da ka lynti ba tyngeh.
Shuh shuh u Bah K. S. Suchiang u la byrngem ba lada jia biang ka jingshah kawang maw kumba la jia mynshwa ka seng kan ujor beit da ka ejahar namar myn ha kato ka por ba long public hearing ki dkhot ka KSU ki la shah kawang maw bad ong ba kane ka dei kaba ym lah ban pdiang.
Shuh shuh, ka seng ka pynpaw ka jingsngew lyngngoh ïa ka por ban pynlong ïa ka public hearing namar katkum ka Notification ba la pynmih da ka tnat Meghalaya State Pollution Control Board la lap ba ym shem la thoh wat tang ka reference No. bad ka por long hearing ruh ka dei dangstep por 8 baje mynstep. “Kaei kane ka jingleh kaba ym sngew ïahap, balei ym pynlong kum ka por trei office (Office Work),” pynpaw ka KSU na East Jaiñtia Hills bad ka seng ka suba jur ruh ba imat ka don kaei re kaei sha lyndet.
“Ka seng kan ïai don ryngkat bad ki paidbah ka hima Elaka Sutnga bad paidbah Shnongrim bad kumjuh ki nongshong shnong ka Elaka Nongkhlieh,” ong ki nongïalam ka KSU East Jaiñtia Hills District.