Kiew stet ka jylla ha ka roi ka par naduh ba ïalam ka NPP ïa ka jingsynshar ong u Dy.CM

Shillong, Naitung 28 : U Symbud Myntri Rangbah ka jylla bad National Vice President ka National People’s Party, u Bah Sniawbhalang Dhar, u la kam ba ka Meghalaya ka la sakhi ïa ka jingkiew kaba kynsan bad khraw tam ha kine ki phra snem ba ka sorkar MDA ba ïalam da ka NPP ka synshar ïa ka jylla.
U la ong ba ka mang tyngka jong ka jylla ka la tam ïa ka 30,000 klur tyngka katba ka Sorkar Pdeng ka la mynjur ïa ki projek kiba kot palat 42,000 klur tyngka ha kine ki phra snem ba la leit.
Haba kren ha ka jingïalap elekshon na ka bynta u kyrtong ka NPP ha ka Shillong Lok Sabha by-election, u Dr. DRL Nonglait, ha Umdihar, Umsning, Ri Bhoi, u Bah Sniawbhalang Dhar u la ong ba ka roi ka par ka jylla mynta ka paw ha baroh ki bynta, kynthup ha ki surok, ka koit ka khiah, ka pule puthi, ki jingïalehkai bad ka kam jngohkai pyrthei.
U la ong ba shuwa u snem 2018 ym ju don ki projek surok kiba kot da ki spah klur tyngka, hynrei mynta ki projek kiba kot da ki hajar klur ki la wan sha Meghalaya lyngba ka jingïarap jong ka Sorkar Pdeng.
“Shuwa u snem 2018 ngim ju ïohsngew ïa ki projek surok kiba kot da ki spah klur. Mynta ki la poi sha ki hajar klur namar ba ka Sorkar Pdeng ka la ai jingïarap ïa ka Meghalaya.”
U Bah Dhar u la kdew ruh ba dang shen u Myntri ka Sorkar Pdeng, u Nitin Gadkari, u la buh mawnongrim ïa ka projek kaba kot 3,000 klur tyngka bad u la pynbna sa ïa ki projek kiba kot 39,000 klur tyngka na ka bynta ka jylla.
U la ong ruh ba ha kine ki khyndiat sngi ba la dep, haduh hynñiew haduh phra ngut ki Myntri ka Sorkar Pdeng ki la wan sha Shillong, bad ki la ai jingïaroh ïa ka Meghalaya kum ka jylla kaba pyndonkam hok eh ïa ka pisa ba wan na ka Sorkar Pdeng.
Haba kren shaphang ka jingïohnong ka jylla, u Bah Dhar u la ong ba ha u snem 2018 ka mang tyngka ka jylla ka long tang kumba 9,000 klur tyngka hynrei mynta ka la kiew sha palat 30,000 klur tyngka
“Ha u snem 2018 ka mang tyngka ka jylla ka long tang kumba Rs. 9,000 klur tyngka Mynta ka la tam ïa ka 30,000 cklur tyngka namar ba ka sorkar ka trei hok ïa la ka kam.”
U Bah Dhar u la ong ba ka sorkar kam shym la pynleit jingmut tang ha ka shna surok, hynrei ka la leh bun ki kam ha ki bynta jong ka sports, ka pule puthi, ka koit ka khiah bad ka tourism.
U la ong ba ka Meghalaya kan sa don bun tam ki Artificial Football Turf ha India bad ka stadium phutbol kaba heh tam ha ka ri ka dang shna ha Mawkhanu da ka jinglut kaba palat 700 klur tyngka
Ha ka tourism, u la ong ba ka mang tyngka ka la kiew na tang 40 haduh 50 klur shuwa u snem 2018 sha ki hajar klur mynta, katba ki Homestay ki la kiew na 500 sha ka thong ban poi 5,000 lyngba ka jingïarap pisa na ka sorkar.
Katkum ka jingïathuh jong u, man ka sngi ki don kumba 7,000 haduh 7,500 tylli ki kali kiba rung sha Shillong, kaba wanrah ka jingïoh lum pisa na ka tourism kaba kot kumba 1,100 klur tyngka shisnem.
U Symbud Myntri Rangbah u la pynksan ïa ka rai jong ka sorkar ban pyntreikam ïa ka rukom siew tulop kaba thymmai ïa kumba 23,000 ngut ki nonghikai, da kaba ong ba watla ka dei ka rai kaba eh, hynrei ka long kaba donkam ban pynbeit ïa ki jingeh kiba la neh bun snem.
“Ngim pynleit jingmut tang ha ki surok. Ngi trei ruh na ka bynta ki samla, ka koit ka khiah, ka pule puthi bad ka tourism. Ka Meghalaya ka dang ïaid shaphrang ha ka lynti kaba dei.”
U Bah Sniawbhalang Dhar u la ong ba ka sorkar MDA ba ïalam da ka NPP kan dang bteng ban pyntrei ïa ki projek pynroi bapher bapher ban kyntiew ïa ka jylla bad ka bha ka miat jong ki paidbah.
Dei ka sorkar NPP kaba la pynkut syndon ïa ka jingïaknieh bor bad knieh shuki kumta skhem ka sorkar mynta la 8 snem