Mad shuwa ïa ka jingkhlad u kpa bud sa ka jingpluh ka ïing hynrei poi ha ka top-20 SSLC

Nongpoh, Jymmang 14: Ka long ka khana kaba sangsot bad kaba myllung ïa kawei ka samla pule kaba la ioh rung haka kyrdan Top 20 naka shnong Umroi Umdohbyrthih ha Ri-Bhoi District, kaba dei ruh ka samla kaba wan naka longiing kaba shem jynjar bad kaba duna ka jingioh naduh ka jingkhlad noh u kpa haka jingjia aksiden kaba dang ha ki khyndiat snem bala leit noh.
Kane ka samla ka dei ka Daiakmen I Ka Talang kaba pass naka skul Ferrando Higher Secondary School, Umroi Nongrah bad rung ruh haka thup top-20 jong ka result SSLC ba dang shu pynbna shen da ka MBOSE kala pyntuid shisha da ki ummat jingkmen ïaka kmie kaba la long riew kynthei khlem u kpa ka iing bad ruh ka burom ïaka shnong ka thaw bad ka dong Ri-Bhoi baroh kawei.
Namar ka jingsarong ïa katei ka nam bad ka burom ba katei ka samla kala wanrah bad lah ban lehbha lyngba ka jingpule ka Dorbar Shnong Umroi Umdohbyrthih hapoh ka jingïalam jong u Bah PB Sylliang kum u Rangbah Shnong u ba la long ruh u kongsan ha kane ka sngi, bad u Bah TB Sun kum u Secretary ryngkat ka EC mynta ka sngi kila pynkup burom ïa katei ka samla haka jingïalang kaba la long haka shnong Umroi Umdohbyrthih.
Ha kane ka sngi nalor ki nongïalam shnong la sakhi ruh da ka jingdonlang ka kong E Sylliang Headmistress ka Landmark Secondary School lem bad ki khynnah skul, ki longkmie ki longkpa kumjuh de ki khun samla katei ka shnong.
Haba phaidien khyndiat ïaka jingïaid lynti katei ka samla bad ka longiing, ka Samla Daiakmen kala hap ban ïaid ka lynti kaba eh, hadien ka jingduh noh ïa u kpa u nongsumar ka iing haka jingjia aksiden kaba la jia ha u snem 2023 bad bud pat sa ka jingpluh ka iing jong ki ha utei hi u snem, hynrei khlem pyndem katei ka samla ka pyneh triang ïala ka mynsiem ban minot thop, bad ki ummat jong ka bad ka kmie ki kylla mawlynnai hadien ba katei ka khun kala siew kylliang da ka jingminot ban poi ha katei ka thup Top-20 bad mynta ka bteng ïaka jingpule jong ka ïaka Class XI Science ha Kendriya Vidyalaya, NEHU Shillong.
Haba kren ha kane ka sngi naka liang ki longkmie bad kumjuh ruh u Bah PB Sylliang kum u Rangbah shnong kila pynpaw ka jingsngewkmen kaba khraw ban iohi ba katei ka samla kalong shisha ka burom ïaka shnong ka thaw bad khamtam ïaka iing ka sem kaba la mad shibun ki jingeh, bad lyngba kane ka samla kan long ruh ka nuksa ïa kiba bun ki khun samla kiba dang pule ha katei ka shnong ba ki jingeh bad ka jingduk kim dei ban khanglad ban poi sha ka thong, lada don ka mon.
Naka liang kitei ki nongkren kila ai ruh ka jingkyrkhu ïa katei ka samla ba kan long ka khlur bad kan nang ïai tyngshaiñ haki jingpule ba kham shalor tad haduh ba kan da poi sha ka thong kumba ka angnud.