Nongpoh, Jymmang 14: Ka Synjuk ki Rangbah Shnong Ri-Bhoi District (SRS) mynta ka sngi ka la leit jingïakynduh kyrpang ïa u Abhilash Baranwal, Deputy Commissioner ka Ri-Bhoi, ban pynpaw ïa ka jingsngewnguh halor ka jingshakri jong u ha ka district shuwa ba un leit shimti noh kum u Deputy Commissioner ka East Khasi Hills District.
Ha kane ka jingïakynduh, ki nongïalam ka Synjuk hapoh ka jingïalam u Chairman Bah B.B. Makdoh bad u Secretary Bah P.B. Sylliang ki la ai jingïaroh ïa ka rukom treikam jong une u ophisar uba la trei shitom na ka bynta ka bha ka miat bad ka roi ka par jong ka Ri-Bhoi District.
Ka Synjuk ka la ong ba u paidbah ka district ki sngewtynnad bad burom ïa une u ophisar namar ka jingïajan bad ka jingsngewrit jong u, hynrei watla u bat ïa ka kyrdan kaba heh kum u Deputy Commissioner, um ju don kano kano ka jingdom, ka jingleh meng ne kren heh ïaki paidbah hynrei u ju long uba kloi ban sngap ïa ki jingeh bad jingdonkam jong ki paidbah, bad pyrshang katba lah ban ïatreilang bad ki nongïalam shnong bad ki paidbah.
Naka liang ka Synjuk ka la kitbok kitrwiang ïa u Abhilash Baranwal ba un dang lah ban trei kham bha ïaka kam bad ai ka jingshakri ba kham paka sha East Khasi Hills District kaba un sa leit ban shimti shen.
