Lynñiar ki paidbah ba im ja na jingwan ki tourist ha ki thaiñ Sohra

Shillong, Nailar 04 : Ki jaka jngohkai ba pawnam kiba don ha ka thaiñ Sohra tang shu poi ki bnai Jymmang (May) ter ter haduh u bnai Nailar (August) ki shlei beit da ki nongjngohkai pyrthei kiba wan na kylleng ki bynta jong ka Ri India bad ruh na kylleng ki bynta jong ka pyrthei.
Hynrei kynsan kynsan ha kine ki shi taïew tam jan baroh ki jaka jngohkai kiba don ha ka thaiñ ki shong thylli lut lait noh tang ha ki katto katne ki jaka.
Na ka liang u President jong ka Meghalaya Tourist Fourm, Bah Alan West Kharkongor haba ïa kren bad u Mawphor u la kubur ba mynta ki la sakhi ba ka jingwan ki nongjngohkai pyrthei sha ka thaiñ ka la hiar kynsan da ki phew phew shah lada nujor bad kiwei ki snem ba la dep.
“Ho,oid i dei tang na i jingjia iba rit hynrei ha kane ka juk jong ki social media ka ishu ka la nang heh nangheh bad kumta bun ki paidbah kiba thmu ban wan sha kane ka jylla ki la syier bad artatien noh. Ngi hap ban sngewthuh ba ki briew kiba nabar tang shu tip ba ka don ka kynrum kynram ki la kynran dien noh ban wan,” u la ong.
Haba jubab halor ka jingkylli ba kaei pat ka sienjam ba kum ka Forum kan shim halor kane ka bynta na ka liang u Bah Alan u la ong, “Ngi la dep ban kynduh ïa ka sorkar jylla bad kyntu ïa ki ba kin leh ïa kaba bha tam namar kiba im ja na ka jingwan ki nongjngohkai kim dei tang kiba buh ïa ki resort, ki homestay, ki restaurant hynrei naduh kiba die khaw, die doh, die jhur haduh ki kali kamai ki imja lang.”
Nalorkata, u ong ruh ba kane ka jinghiar jong ka ïew ka hat ha ka thain Sohra ka la ktah lut ïa baroh bad haman la ki liang. “Mynta wat naduh kiba ñiah ïa ki kali kamai haduh ki nongshong dukan ki la sngewthuh lut ïa ka jingshah ktah namar ym don ïew shuh ïa ki ruh.”
Lah ruh ban kdew hangne ba man ka sngi ka jinghiar ki kali ba kit ïa ki nongjngohkai pyrthei sha ki thaiñ Sohra ne sha ki thain Dawki ka long beit da ki spah tylli ha ka shisngi. Bad la ju ïohi ruh ba ha ki sngi Saitjaiñ khamtam ha ka sngi U Blei ki jaka ieng kali ha kitei ki jaka jngohkai ki shlei lut. Ym tang kine, wat ki dukan rit ba die ïa ki jingbam khutia, ki dukan sha bad kito kiba ju die ïa ki riewhadem ba shu thang ha rud surok ruh ki phuh samrkhie ba ka biang ka kamai.
Hynrei, kitei ki jaka mynta baroh ki la kynjah jar khamtam eh kito ki jaka jngohkai kiba kham khring ïa ki paidbah.
U Bah Alan u la pynkynmaw ba kum ka thaiñ ki la ïakhun tyngeh ha kine ki 10-15 snem kumno ban khring ïa ki nongwan jngohkai pyrthei ba kin phaikhmat sha kane ka jylla da ka thong ban kyntiew ïa ka ïoh ka kot bad kane shisha ka la urlong bad kiew stet bha kine ki khyndiat snem ba la dep.
Kumta, u ong ba ki khmih lynti bad kyrmen ba kum ka thaiñ kaba shaniah mynta ha ka jingwan ki nongjngohkai pyrthei kin bteng ban pahuh pahai bad imja ha ka jingsuk jingsaiñ.