Lyngngoh u Myntri ba batai bakla u Ophisar ïa ka shim jait Khasi katkum ka Lineage Act

By Mawphor News Desk On Dec 2, 2023

Shillong, Nohprah, 01: U Myntri ka tnat Social Welfare Bah Paul Lyngdoh u la ong ba ka shithi ba la phah da u Under Secretary sha ki Deputy Commissioner da kaba kdew ba ka tnga bym dei ka Khasi ka lah ban shim ïa ka jait ka khong jong u tnga Khasi ka long kaba sngewlynngoh bad ka dei kaba la shu ïalam bakla ïa ka KHAD (Khasi Social Custom of Lineage) Act, 1997.
“Haoid, nga sngewthuh ïa ka sur jingsngewkhia ba la pynpaw da ka HYC halor kane ka kam. Ka long kaba lyngngoh ban pynmih kum ïa kata ka jingpynbna,” la ong u Bah Paul ha ka jingïakren bad ki lad pathai khubor ha ka sngi Thohdieng.
Katkum ka jingong jong u, katkum ka lynti jong ka aiñ shisien ba ïa ka Aiñ-Rew ladep mynjur da ka Council bad ka la ïoh ïa ka jingmynjur na u Lat ka Jylla ka mut ba ka Sorkar Jylla ka ladep bishar bniah nadong shadong.
“Ym dei satia ban pynmih ïa kano kano ka jingpynbna kaba pynjngut noh ïa ka bynta ba la mynjur da ka Ingdorbar Thawaiñ khamtam ïa ka Aiñ kaba la ïoh jingmynjur na u Lat,” la ong u Myntri ka tnat Social Welfare.
Shuh shuh u la ïathuh ba u la pan ïa ka File na ka tnat Social Welfare bad ong ruh ba un sa bishar bniah bin pa bin.
Ha ka sngi Palei, ka KHADC ka la phah da ka jingthoh sha ka Sorkar Jylla ban phah weng noh mardor ïa ka shithi jong u Under Secretary ka tnat Social Welfare halor ka jingkynnoh ba ka la batai bakla ïa ka KHAD (Khasi Social Custom of Lineage) Act, 1997.
“Ngin sa thoh sha ka Sorkar Jylla ba kan weng noh ïa kane ka shithi. Ka Council haduh mynta kam pat ïoh ïa ka kopi jong ka shithi bad ngi shu ïoh jingtip halor kane,” la ong u Chief Executive Member (CEM) ka KHADC Bah Pynïaid Sing Syiem ha ka sngi Palei.
Ka Hynñiewtrep Youth Council (HYC) ha ka sngi Balang ka la dawa ïa ka Sorkar ba ka dei ban weng mardor ïa kane ka shithi.
Ka shithi ka ong, “ka Lineage Act, 1997 kam mana ban ai syrnot ST ïa kino kino kiba aplai ban shim ïa ka jait ka khong jong u Kpa ne ka Kmie, bad ka jingshim ïa ka jait jong u tnga da ka tnga ka bym dei ka Khasi ka dei kaba ju shah.”