Shillong Nohprah 1: U Nongïalam bad u MLA ka BJP na ka South Shillong u Bah Sanbor Shullai ula ong, “Ka BJP kan pdiang don burom da kaba siang wat da ka karpet rong saw ruh lada wan pynïasoh u Myntri Rangbah barim ka jylla u Dr Mukul Sangma bad u MP ka Shillong Parliamentary Constituency u Bah Vincent Pala sha ka BJP.
“Ngi kum ka seng ngi la don lypa ïa ka thong ban pynkhlaiñ ïa ka BJP bad ngi ïatrei katba lah ban pynsngewthuh ïa ki paidbah ban pynïasoh sha ka BJP, te lada u Bah Vincent Pala u wan rung sha ka BJP, ngin pdiang sngewbha da kaba siang syndon da ka karpet rong saw” ong u Bah Sanbor Shullai.
Ha kaba ïadei bad ka jingsaphriang ki khubor ba ka don ka jingïakren bad u Dr Mukul Sangma ban wan pynïasoh noh sha ka seng BJP, u Bah Sanbor Shullai ula ong, “Ngam don jingtip ei ei halor kane, hynrei nga la shu ïohi tang ha ki kot khubor, hynrei ma nga shimet hi, nga lah ïakynduh ïa u Dr Mukul ha ka ïingdorbar kaba la dep bad hadien katei kam ju don ka jingïakren ne jingïakynduh ia u Dr Mukul”
“Lada u Dr Mukul bad u Bah Pala ki wan pynïasoh sha ka BJP, ngin pdiang sngewbha da kaba siang da ka karpet rong saw syndon namar ki dei ki nongïalam kiba la ih bha ha ka kam saiñ pyrthei ha ka jylla” ong u Bah Sanbor.
Haba kylli la u don kano kano ka jingthmu ban leit ïakynduh bad ban ïakren bad kitei ki ar ngut ki nongïalam ban rung noh sha ka BJP, u Bah Sanbor ula ong, “Namar ba nga la ïohi ïa ki jingmih ha ki kot khubor kumta ynda nga ïoh por, ngan leit kren bad kam don jingeh ïa nga ban leit ïakren ïa ki bad lada ki pynpaw ïa ka jongkloi ban pynïasoh sha ka BJP, kumta ngin sa pyntip sha ki nongïalam kiba hakhmat jong ka BJP kiba don ha Delhi”.
U Bah Sanbor ula ong, ba kitei ki arngut ki nongïalam ki dei kiba la paw bha ha ka kam saiñ pyrthei ha ka jylla bad ki dei ruh kiba la ih bha ha kane ka kam, kumta kan long kaba ïahap shibun ïa ki lada ki rung sha ka BJP bad ka dei ban long ha nongbah Delhi ha kaba ki nongïalam kiba hakhmat eh jong ka party kin pdiang sngewbha ïa ki sha ka seng BJP.
