Ka UDP ka la ïaid sakhmat ban wad la u jong u kyrtong na Shillong Seat : Paul Lyngdoh

Shillong, Nohprah, 01: U Working President ka UDP u Bah Paul Lyngdoh ha ka sngi Thohdieng u la ong ba ka UDP ka ladep ïaid sakhmat ban sei la u jong u kyrtong na ka bynta ban pynïakhun na Shillong Seat ha ka elekshon Lok Sabha, ka ban sa long ha u snem ban sa wan.
“Ka lynti ban jied ïa u kyrtong kan long shi bnai ne duna ïa kata,” ong u Bah Paul ha ka jingïakren bad ki lad pathai khubor.
Lah ban kdew hangne ba ka NPP ka la kyrshan ïa u kyrtong monlang ba la pynieng da ka UDP ka elekshon Lok Sabha ha u snem 2019.
U State President ka NPP, Bah Prestone Tynsong u la ong ba ha u snem 2019 ka NPP ka la mynjur ban kyrshan ïa u kyrtong monlang ba la pynieng da ka paralok ba ïatreilang ha ka kynhun jong ka MDA, ka UDP, hynrei mynta ka kynti ka NPP ban sei la ki jong ki kyrtong bad kam shym la don kano kano ka jingïakren halor kane.
Haba kylli, hato u President barim ka HYC u Bah Robertjune Kharjahrin u dei neem uba hakhmat eh u ban pan tiket, u Bah Paul u la ong ba u Bah Kharjahring u ladei lypa uwei na kiba pan tiket bad uba la pynpaw ïa ka jingkwah ban ïakhun ïa ka elekshon na Shillong Parliamentary Seat.
“Kumba ngi la ïakren, kin don 3-4 ngut ki nongpan tiket bad nga tharai yn sa lah ban pyntip hapoh khyndiat sngi ne khyndiat taiew,” u la bynrap
Haba yntip ba ka jingpynkhreh ïa ka elekshon MDC ka la ïaid shakhmat, u Bah Paul u la ong ba ka State Election Committee jong ka UDP ka la shong jingïalang bunsien halor kane ka kam.
“Ngi lah ban pynbna ïa ka thup kyrteng banyngkong eh jong ki kyrtong la kumno kumno ha kaba kut jong u bnai Kyllalyngkot,” la bynrap u Bah Paul.