Lyngngoh ka FKJGP ba hap thied dawai ki nongpang na shabar ba sumar ha Civil Hospital

Shillong, K’ Lyngkot 14: Ka Federation of Khasi Jaiñtia and Garo People (FKJGP) ha ka sngi baar ka la dawa ïa ka sorkar jylla ba kan pynbeit ïa kiba bun ki jingduna kiba don hapoh ka Shillong Civil hospital kiba la ktah ïa ki paidbah, khamtam kyrpang ïa kito ki longïing kiba wan na ki ïing kiba duk ba kyrduh, kiba shaniah tylli ban ïoh ki lad jingsumar ha kane ka hospital bad na ka liang ka seng ka la pynpaw ruh ïa ka jingsngew lyngngoh kaba jur ban lap ba ki nongpang kiba leit sumar ha kane ka Hospital ki hap ban thied dawai na shabar.
Hadien ka jingïakynduh bad medical superintendent hadien ba la ïohpdiang ïa kiba bun ki jingkhñium na ki paidbah haba ïadei bad kane ka kam, u President ka FKJGP u Bah Dundee C Khongsit u la ong ba kane kadei ka kam kaba sngewkhia ban tip shaphang kiba bun ki jingduna ba la mad da ka civil hospital.
“Ka jingsuk ban ïoh pyndonkam na ka bynta ka jingïoh ïa ka koit ka khiah kaba bha ka dei ka hok jong manla ki nongshong shnong jong ka jylla. Namar kata ngi kyntu ïa ka sorkar ban buh ïa ka koit ka khiah kum ka kam kaba hakhmat duh namar ka jingduna ka jingdon ki lad ka koit ka khiah ki la ktah ïa ki nongshong shnong kiba tlot ka ïoh ka kot jong ka jylla, kiba shaniah tylli ha kine ki jaka sumar jong ka sorkar. Ngi dawa ruh kumjuh ïa ka sorkar ba ka dei ban shim khia mardor ïa ki sienjam ban pynbeit ïa kine ki jingduna kiba long na ka bynta ka bha ka miat jong ki nongshong shnong jong ka jylla,” ong u Bah Khongsit haba ïakren bad ki lad pathai khubor.
U President ka FKJGP u la ïathuh ba ha ka jingïakynduh bad ka medical superintendent (MS) ka la ong ïa ki dkhot ka seng ba ki bor pynïaid jong ka hospital ki la dep ban ïakren bad ka sorkar haba ïadei bad kane ka kam bad kumjuh ruh haba ïadei bad ka jingbym treikam ka kor MRI naduh u snem 2018. Hynrei haduh mynta kam shim la don satia ka jingshim kam ban pynlong ïa kane ka kor ka ban treikam.
“Na ka jingïathuh jong ka, ngi lah ban mutdur ba kum kane ka kor kam don ha civil hospital kaba don ha nongbah jong ka jylla, kum kaei ka jingai jingshakri halor ka koit ka khiah ngi lah ban khmih lynti ban ai sha ki paidbah khamtam ïa kito kiba wan na ki thaiñ nongkyndong jong ka jylla,” u la ong.
U la ong ruh ba ka MS ka la ïathuh ba hadien ba la pynkynriah ïa ka doktor pathologist sha Ganesh Das hospital, kam shym la don satia ka sienjam ban thung bad ban bujli da uwei pat ban trei hapoh civil hospital bad dei halor kane ba ïa ka jingleh test halor ka pathology ym lah satia ban leh ha kane ka hospital.
“Ka MS ka la ïathuh ruh halor ka jingduna ki nongtrei kaba dei ruh ka daw sha lyndet jong ka jingpulom ban lah ban pynbeit ïa ki jingujor jong ki paidbah manla ka sngi kaba ki la thep hapoh ka complaint box,” u la bynrap.
Ha kane ka jingleit jurip ïa kane ka jaka sumar kaba don ha nongbah Shillong, na ka liang ka seng ka la ïoh ruh ban ïakren bad ki paidbah bad ki nongpang kiba thiah ha kane ka jaka sumar bad ha kaba ka la pynpaw ïa ka jingsngew lyngngoh ba ki paidbah ki hap ban thied ïa ki dawai na shabar bad kim shym la ïoh satia napoh kane ka hospital.