Shillong, Jylliew, 28: Ka sorkar pdeng bad sorkar jylla ne ka National Disaster Management Authority ki la pynkhreh mynta ban ïakhun pyrshah ne teh lakam ïa ka jingpynjot ki bor ka mariang lyngba ki Village Disaster Management Plan(VDMP).
Kane ka long da kaba thaw ïa ki Komiti bapher bapher ha ki Shnong khnang ban pynkhreh lypa ïa ki jingdonkam ban leh lada jia ba wan ki jingpynjulor ki bor ka mariang kum ka jingshlei um, ka jingtwa khyndew, ka eriong, ka jingpluh ding, jingkhynñiuh jumai bad kiwei kiwei.
Kine ki Komiti ki long ka jingpynkhreh ki Shnong kumno ban shim ïa ki lad ki lynti naduh ka jingïarap ïa ki lanot, ka jingïarap haba twa iing, ban wad ïa kiba shah rah um, kiba shah ban khyndew, kiba duh ne julor noh ki iing ki sem, kiba duh noh ki jingri jingdup bad kiwei kiwei.
Kum shi bynta ban pynsngewthuh ïa ki nongïalam shnong, ka ophis u BDO Mawthadraishan Block bad ka ophis u DDMO jong ka Eastern West Khasi Hills Dustrict ryngkat ka jingai kti lang ka Meghalaya Administrative Training Institute, Shillong ka la pynlong ïa ka Workshop ha SGSY Hall, Mawthadraishan Block ha kaba la wan ïashim bynta da ki Sordar bad Secretary Shnong.
U nongai jinghikai ne resource Person u long u Bah Phyrnai Marbañiang, u trainer jong ka MATI.
U Bah Phyrnai u la ai ka presentation kumno ban kynkhreh ïa Plan ha ki Shnong lyngba ka form ba la pynkhreh da ka sorkar bad ka jingthaw ruh ïa ki komiti bapher bapher kaba donkam ïa ka jingïatrei lang ki paidbah.
