Shillong, Jylliew, 28: Ki Pulit ka Anti infiltration Directorate ba la lamkhmat da u Incharge Bah Olde Syiemlieh ryngkat ka jingsynran lang jong ki nongtrei na ka tnat Labour ka Sorkar Jylla ha ka sngi Thohdieng ki la hiar sha ka thaiñ Sohra ban jurip ïa ki jaka ba don ki nongbylla bar jylla kum ha ki Institute, ki Hotel, ki Guest House, ki Resturant bad kiwei kiwei.
Ka jinghiar tohkit da ki Pulit jong ka Anti infiltration Directorate ka long kum shi bynta ban pyntikna ba ki briew kiba nabar ka jylla kiba wan trei bylla hapoh ka jylla Meghalaya la ki dei neem ki nong India bad ki dei neem kiba ladep ban leh ïa ka Registration hapoh ka ophis jong ka tnat Labour.
Ha ka jingïakren bad ki lad pathai khubor hadien ka jingjurip, u Inspector of Labour Bah Medonsamlem Dkhar u la ong ba ka jingjurip ïa ki kot ki sla jong ki nongbylla bar jylla ka long ban pyntikna ba kino kino kiba wan trei bylla sngi sha ka jylla Meghalaya ki dei ban don ïa ka Labour Registration bad ruh ban peit na bynta kito kiba ladep ban Register la ki pynthymmai neem ïa ka Registration jong ki hadien ba lah kut ka por.
Kumba ka long mynta, ha ka jinghiar jurip ki Pulit bad ka tnat Labour ki la lap ba bun na ki trai shnong kiba aikam ïa ki nongbylla bar jylla ki dei kiba biang lut ki kot ki sla.
