Lyngba ki dur pyntip paidbah ka CBC Shillong ïa ki nongïaleh laitluid ka North East

Shillong, Lber, 01: Ka Central Bureau of Communication (CBC), Tnat Information and Broadcasting, Sorkar India, Regional Office, (MT Region), Shillong ka la pynlong ïa ka Photo Exhibition & ka jingai jingtip kaba ar sngi halor ki nongïakhun jinglaitluid jong ka thain shatei lammihngi bad ka bam kaba tei ha Ramakrishna Mission Higher Secondary School, Mylliem.
Ha kane ka exhibition la pyni ïa ka jingïakhun jinglaitluid jong ka India lyngba ka jingpyni ïa ki dur. Ka jingai jingtip ka thmu ruh ban kyntiew ïa ka bam kaba tei bad pyni ïa ki sienjam jong ka sorkar ban ïakhun ïa ka jingduna ka bam kaba tei da kaba kyntiew ïa ki rukom bam kiba tei.
Ka DHEO, East Khasi Hills, Kong O Summer ha ka jingai jingkren jong ka, ka la batai sani shaphang ka bam tynrai na ka bynta ka jingtei ïa ka met, ka jingsan ka jabieng bad ka jingïakhun ïa ka jingduna snam (anaemia). Ka la ban jur halor ka jingkyntiew ïa ki jingtei met bad ka jingbam ïa ka bam kaba bha. Ka la ban jur ruh halor ka jingïadei jong ka bam bad ki jingpang bapher bapher bad ka rukom bam kaba dei. Ka la pynkut ïa ka jingkren jong ka da kaba pynshlur ïa ki khynnah pule ban dih shisien shi taiew ïa u dawai Folic Acid bad ïa u dawai Albendazole arsien ha ka shi snem khnang ban pynduh jait ïa ka jing duna snam.
Ka Kong Icydora Nongrum, Principal jong ka skul ka la pynpaw ka jingsngewnguh jong ka ïa ka CBC, Shillong kaba la pynlong ïa ka exhibition bad ka ong ba kane kan ïarap ban ai jinghikai ïa ki briew, bad khamtam ki khynnah pule, shaphang ka jinglenlade kaba khraw jong ki Nongïakhun jinglaitluid na ka bynta ka ri. Ka la ong shuh shuh ba lyngba ki dur ba la buh ha kane ka exhibition ki khynnah pule ki ïoh jingtip shaphang ki riewshlur ki bym shym la paw pyrthei jong ka thain shatei lammihngi kiba la nohsynniang sha ka jinglaitluid jong ka ri. Haba kren shaphang ka bam kaba tei, ka la kyntu ïa baroh ki khynnah pule ban pynneh ïa ka rukom bam kaba ryntih bad ban pynthikna ba ki bam kumba 5 jait ki bam ha ka shi sngi ba kynthup ïa ka carbohydrate, ki protein, ki shana dai, ki jingbam ba shna na ka dud, ki jhur jyrngam.
La pynlong ïa ki jingïakop bapher bapher hapdeng ki khynnah pule jong ka skul ha kane ka prokram kaba ar sngi. La sakhi ruh ïa ka jingïashim bynta shitrhem ha ka jingïakop rwai, quiz, bad ka jingdro dur. La sam ïa ki khusnam sha ki nongjop ha ka jingïalang pynkut ba la pynlong mynta ka sngi.