Wer ka Myntri ïa ki longkmie ban pyndonkam ïa ka jaka sumar thymmai ban myntoi ki khun

Shillong, Lber 01: : Ka Myntri ka tnad ka Koit ka Khiah ka sorkar jylla, Kong Ampareen Lyngdoh ka la kyntu ïa ki kmie ki kpa ba kin pyndonkam hok ïa ka jaka sumar kaba la kyntiew kyrdan na ka Sawsymper Sub-Centre sha ka Primary Health Centre, na bynta ka jingkoit jingkhiah ki khun ki kti jong ki hi.
Ïa kane ka myntri ka la kren ha ka jingïalang buh mawnongrim ban kyntiew kyrdan noh ïa kane ka sub centre sha ka Sawsymper PHC kaba long ha kane ka sngi Ba-ar ha Sawsymper.
Ha kane ka sngi la donlang ruh naduh u MLA ka Mawsynram MLA, Bah Ollan Singh Suin, DHS (MI) Dr R Lyngdoh, DMHO East Khasi Hills District Dr S.A Lyngdoh nalor ki ophisar bad kiwei kiwei.
Ka Myntri ka la kular ruh ha ki paidbah ba ka sorkar kan kyrshan na bynta ki jingdonkam la ka long naduh ki nongtrei, ki tiar ki tar bad ka jaka sah na bynta ki doktor bad ki nongtrei.
“Ka sorkar ka don ka thong ban pynbiang ïa ki jaka sumar kiba paka na bynta ki nongshong shnong khnang ba kin ïoh ïa ka jingkoit jingkhiah kaba biang. Ka PHC kadei ruh ka sakhi ban pynshisha ïa ka jingai ka jingshakri kaba bha tam sha ki nongshong shnong la ka long ha sor haduh nongkyndong,” ka la long.
Ha kajuh ka por ka la ai khublei ruh ïa baroh kiba donkti ha kaban pynurlong ïa katei ka jaka sumar kaban pynmyntoi ïa ka Sawsymper bad ki jaka ba marjan.
Ka Myntri ka la kyntu ruh ïa ki nongïalam shnong ba kin trei ryngkat ryngkat bad ka tnad bad ong ba ka tnad ruh ka don ka jingkhmih lynti ba kin treilang la ka long naduh ka jingsoi bad ka jingaiti ïa ka jaka.