Dei bym pat phah ki tnad Sorkar ïa ka jingpynkhreh ïa ka Roster

Nongpoh, Lber 01: Ki dkhot jong ka District Selection Committee, Ri-Bhoi District mynta ka sngi kila pynshai paidbah halor ka jingslem ban pynlait ïa ka Result DSC jong ki post bapher bapher wat hadien bala dep ban pynlong ïa ka eksam thungkam ha u snem 2021-22.
Haba kren sha ki lad pathai khubor na ka liang u Bah WS Ryntathiang Vice Chairman ka DSC haka jingdonlang u Bah Pullstar Nongrum bad u Bah Marcus Lapasam kiba dei ki Member DSC u la ong ba ïa ka jingpynbna ne Advertisement halor ki post bapher bapher jong ka DSC la pynbna ha u snem 2020 hynrei namar ka jingwan lyngshop jong ka khlam Covid-19 la lah ban pynlong ïa ka eksam thungkam haduh u snem 2021 bad 2022 bad tang hadien ba ki samla thepkam kila dep ban thoh eksam ka la mih sa kawei ka Court Order bala bthah ba dep ban pyntreikam ïa ka Roster System.
U la ong ruh ba hadien ka jingmih katei ka order la hap ban pynsangeh biang namar ka DSC kam don bor ban shna ïa ki Roster hynrei ki tnad sorkar ne line department kiba dei ban leh ïa katei ka kam bala bthah ruh ïa ki hadien bala dep pynlong da ka jingïakynduh (meeting) bad kumjuh ruh ki jinghikai (training) kumno ban pynkhreh lane ban shna ïa ka Roster, hynrei haduh mynta ym pat don kawei ruh ka tnad sorkar kaba la dep ban pynkhreh ïa ka Roster.
U la ong ruh ba na ka liang ka DSC kam shym la shongthaid ha kaba ïadei bad ka result DSC bad ka la phah ruh da ki jingpynkynmaw la kumba 4 sien sha ki tnad sorkar bapher bapher hynrei haduh mynta ym pat ïoh pdiang wat tang kawei ruh kaba dei ka daw ka jingpynslem ban pynmih ïa ka Result DSC, bad lada ki tnad sorkar lane line department kila la dep ban pynkhreh pynkhrum bad ban pynbiang ïa ka Roster kam don jingeh ban pynmih kloi ïa ka Result, ha kaba u la kyntu ruh ïa ki tnad sorkar ba don kumba 24 tylli ba kin pynkhreh bad ban pynbiang noh ïa ka Roster khnang ba yn lah ban pynmih kloi ïa ka Result bad lada ki don kano kano ka jingleh ki lah ruh ban leit mih sha DSC na ka bynta ki jingïarap.
Kum ban shu kdew hangne ba ki don haduh 108 ki post bapher bapher bala dep ban pynbna ha u snem 2020 bad ba ki samla kila dep ban thoh eksam ha u snem 2021-22, hynrei haduh mynta ym pat lah ban pynmih ïa ka Result na ka daw jong ka Roster System ha kaba na ka liang ki kynhun seng bhalang ba kynthup ïa ka Ri-Bhoi People’s Council bad ka MPSO kila rai ban ïakhih da ka ba shong kyllaiñ mungor haka 4 tarik ha Nongpoh ban dawa ba dei ban pynmih noh ïa ka result DSC ha Ri-Bhoi.