Nongpoh, Lber 01: Ka District Legal Service Authority (DLSA) Ri-Bhoi District, hapoh ka jinglam khmat ka National Legal Services Authority haka sngi palei ka la lah ban pynlong ïa ka prokram ai jinghikai sha ki paidbah halor ka jingdonkam ka pule ka puthi bad ka jingplielad ïa ki khynnah ba kim dei ban pep skul shiteng por haka shnong Umkei Ri-Bhoi District.
Ha katei ka prokram la wan ruh ban shim bynta da ki nongshong shnong jong ka shnong Umkei bad la wan ruh ban mihkhmat da ka kong DMKS Shadap MJS, Secretary DLSA, Kong M Namsaw bad ka kong Q Mawphñiang kiba dei ki Legal Aid Counsel bad kiwei kiwei ki ophisar na ki tnad sorkar bapher bapher.
Na ka liang ka kong DMKS Shadap haba kren ha katei ka sngi ka la pynshai ba ka jingthmu jong ka DLSA ban pynlong kum katei ka jait prokram ka long ai jinghikai sha ki paidbah ba kin tip ïa ka hok bad kino kino ki nongshong shnong kin nym shah ieh shadien la ka long da kano kano ka daw hynrei dei ban long salonsar kumjuh.
Na ka liang ki nongkren ha katei ka sngi kila pynshai sha ki paidbah halor ka jingeh ba mad da ki khynnah bad ruh ka jingdonkam ban ïada bad ban ai ka hok haki bad ki skhim bapher bapher na ka bynta ki khynnah ba kim dei ban duh ïa ki jingpule bad ban pep skul shiteng por khamtam ka hok ba ki khynnah ki dei ban ïoh ka jingpule ei katkum ka Right to Free and compulsory education act 2009.
