Mawkyrwat, Lber 01: Ka Bureau jong ka Indian Standards (BIS), Ministry of Consumer Affairs, Food and Public Distribution jong ka sorkar India ryngkat bad ka District Rural Development Agency (DRDA), South West Khasi Hills District lem bad ka ophis jong u Block Development Officer (BDO), Mawkyrwat C&RD Block ki la pynlong ïa ka prokram ban pynsngewthuh paidbah halor kumno ban tip bad ithuh ïa ki mar ki mata kiba thok bad kiba shisha naduh ki marbam mardih, ki tiar lait bad kiwei de.
Ha kane ka sngi kiba la wan ban pynshai ki long da u Subham Sanu bad ka Barisha Jyoti Baishya kiba dei ki Standard Promotion Consultant ka BIS ha ka jingdonlang u bah K. Snaitang, District Program Manager (DPM) jong ka DRDA bad kiwei.
Haba kren ha ki lad pathai khubor hadien ka jingpynshai paidbah, ka Barisha Jyoti Baishya kiba dei ki Standard Promotion Consultant ka BIS ka la ong ba kum kine ki jait prokram ki long kiba donkam bad kongsan ha kane ka juk kaba mynta ba bun na ki mar thok ki jur ha ki ïew ki hat ba ki paidbah ki donkam ban husiar bad ban tip ïa ki tiar kiba shisha bad kiba thok lyngba ki hallmark, ki license no. bad kiwei kiwei ba ki paidbah ki lah ruh ban peit lyngba ka BIS Care App ban pynthikna ïa ki mar kiba thok bad kiba shisha.
Ka la ong ruh ba ka jingthmu jong katei ka prokram ka long ban ai jinghikai sha ki paidbah ba kim dei ban ngop ha ki mar thok, hynrei ki dei ban tip ïa ka hok jong ki bad ka jinglong thikna ki mar ki mata kiba ki thied bad bam man ka sngi ha kaba ki paidbah ki lah ruh ban ujor lada ki lap ïa ki mar ba suba sniew lyngba katei ka app ha ki mobile phone.
Ïa katei ka prokram la pynlong ha Conference Hall jong ka ophis jong u Block Development Officer (BDO), Mawkyrwat C&RD ha kaba ki nongwan ïashimbynta ki long naduh ki nongïalam shnong na kylleng ki jaka jong ka Mawkyrwat C&RD Block.
