Lyngba ka Society buh thong ki nongïalam shnong ka thaiñ Mawkynrew ban kyntiew ïa ka ‘tourism’

Shillong, Nailar 05 : Ki nongialam shnong na ki shnong bapher bapher kiba hap ha ka thaiñ Mawkynrew, ha ka 03 tarik u Nailar, 2023, ha ryngkat u MLA kane ka thaiñ, kata u Bah Banteidor Lyngdoh, ki la shim ia ka rai ban ïatreilang lyngba ka Mawkynrew Tourism Sociable Society (MTSS) ban kyntiew kham bha ïa ka kam jngohkai pyrthei ne ka Tourism ha kane ka thaiñ.
Ïa kane ka rai la shim na ka jingïalang ïamir jingmut kaba la pynlong ha ïing dorbar shnong Thangsning ha kaba la ïathir kumno ban pynmih pisa, ki lad ïoh kam ïa ki khun samla bad kiwei kiwei pat na ka kam jngohkai pyrthei ha kaba kane ka thaiñ ka la paw bha mynta na ka jingdon ki jaka ba itynnad bad kiba khring ïa ki nongwan jngohkai.
Ka thain Mawkynrew ka don bun tylli ki jaka jngohkai kum ha ka shnong Laitlum, Umtong, Syntung, Khlieh-A-Sem, Nongjrong bad kiwei pat. Kine ki jaka jngohkai ki la khring ïa ki phew hajar ngut ki nongjngoh kai ha ka shi snem bad kumta ki nongïalam shnong bad u MLA ki la sngew dei ban don ki rukom treikam ban pynmih jingmyntoi ïa ki shnong kiba kdup ïa ki jaka jngohkai bapher bapher.
U MLA haba kren ha kane ka jingïalang u la ong ba ka kam jngohkai ka dei kawei kaba kongsan bha ka ban long ka lad pynmih pisa ïa ki dorbar shnong bad ka lad ïoh kam ïa ki khun samla ha ka thain. “Ngi hap ban ïatreilang bad kumta ka jingshna ïa ka Society kan dei na ka bynta ban ïa kyntiew lang ha baroh ki liang”, u la ong.
“Ki jaka jngohkai ki dei ka spah bah ïa ka thaiñ bad nga kyntu ban ïa long kiba sumar khuid ïa ki jingitynnad ba ka Mei Mariang ka ai naduh ki wah, ki khlaw, ki kshaid, ki lum, ki mrad khlaw bad ki sim ki doh”, u la ong. “Ngin ïa thir bun ki kam ynda la shong jingïalang jong ka Society”, u la ong
Da kaba pynpaw ba lyngba ka Society yn ïoh lad ban ïakren bad ki bor Sorkar ban phai khmat sha ki jaka jngohkai da kaba thawlad ban ïoh jingïarap ban shna pynbha bad pynitynnad ïa ki, u Bah Banteidor u la ong ki khun samla kiba la bit la biang ka kyrdan pule ki dei ban mih sha khmat ban trei ban ïeng ha la ki kjat.
U la ong ba ka Society kan ïaleh ban pynpaw pyrthei ïa ki jaka jngohkai ha kane ka thain da kaba buh ïa ka Centre ha ki bynta ban rung sha u pud u sam ka thaiñ Mawkynrew bad ïoh pat ban ïalam ïa ki nongjngoh kai ha ryngkat ka jingshngaiñ.
Ka jingïalang ka la pynskhem ïa u Bah Banteidor Lyngdoh kum u President kane ka Society, u Bah Traibor Nongkhlaw bad u Bah Pynshaibor Synjri kum ki Vice President, u Bah Olet Kharsahnoh kum u Secretary nalor kiwei kiwei pat.
Ha kane ka sngi, u MLA u la sam ruh ïa ki jingkup ban da na u slap sha palat sanphew ngut ki nongshong shnong kiba im ja kpoh da kaba die jingdie sha ki nongwan jngohkai ha Laitlum, ki tourist guide nalor kiwei pat khnang ba ka kam jong ki kan nym thut wat hapdeng u slap ruh.