Shillong, Nailar, 05: Ki samla pule jong ka skulbah North Eastern Hill University (NEHU) kiba don hapoh ka shatri jong ka North Eastern Hill University Students Union Students Union (NEHUSU) ki la khang tala ïa ka khyrdop (Gate-2) jong kane ka skulbah hadien ba ki la dap da ka jingbitar halor ka jingbym pynbiang jong ki bor pynïaid ka skulbah NEHU ïa ki Bos ki ban leit shaw ïa ki samla pule kiba hap ban thoh ïa ka eksamin 2nd Semester ha ka 5 tarik u Nailar, 2023.
Da ki phew ngut ki dkhot jong ka NEHUSU ki la ieng sha surok ban khang lut ïa baroh ki kali kiba rung shapoh kane ka skulbah bad ïa kiba mih napoh. Tang hadien katto katne por ba ki nongïalam ka NEHUSU ki la ïoh da ka jingthoh na ki bor pynïaid jong kane ka skulbah ki la panmap na ki samla pule ba kim shym la lah ban pynbiang ïa ki Bos bad hadien ka jingïakren pynbeit, ki bor pynïaid ki la kular ban pynbiang ïa ki Bos na ka bynta ki samla pule.
Hadien kane ka jingkular, ka NEHUSU ka la plie baing ïa ka khyrdop bad weng noh mardor ïa ka jingïakhih.
