Nongpoh, Nailar 05: Haba pynskhem ïaki nongïalam ba thymmai jong ka HYC Nongpoh Circle mynta ka sngi ha Nongpoh, u Samla Roykupar Synrem General Secretary ka HYC Sengkmie u la kren bynñiaw halor ka jinglong jingman jong ka jaitbynriew, bad ka lawei jong ki samla ba sa katno ngi dang pharia iaka jaitbynriew nalor ba ngi la dei lypa ka jaitbynriew rit paid, ban pynïapher hapdeng u Bhoi U war, Khasi u Pnar, u Maram u Lyngngam, hynrei kala dei ka por ban sangeh ka jingpharia bad kdew kti hynrei ban pyni sha ka pyrthei bad ka ki khun u Hynniewtrep ki dei ki ba tylli bad kiba dang im.
U la ong ruh ba nalor ba ka jaitbynriew kala rit lypa, ki khun samla kiba long ka lawei ka jaitbynriew mynta ki don ha tmier, namar ka jing jyllei jong u drok bad bun ki samla kila kyrni, namar utei u jait jingdih buaid u la sdang ban rung sha man la ki shnong bad kala dei ka por ba ki khun samla kiba don ka jingkitkhlieh kin shim ïaka bynta ban kit ïaka lyngkor naka bynta ban thawdur thymmai ïaka ri bad ka jaitbynriew.
Ha ka jingpynskhem ïaki nongkitkam ka Nongpoh Circle mynta ka sngi u Samla Roykupar Synrem u la sneng la kraw ïaki nongïalam kiba la pynthymmai ba kin shim bad trei ïaka kam kumba la bynshet haki ym ban khwan lane ban shim kabu ha kyrteng jong ka seng tang ban kamai spah kumba kala ju don ruh ka jingkynthoh.
Ïa ki nongkitkam ba pura jong HYC Nongpoh Circle la wan ban pynskhem da sa u Samla Roykupar Synrem General Secretary ka HYC Sengkmie, haka jingdonlang u Samla Hercules Suting President ka Ri Bhoi, Tony Shylla General Secretary, Bah Succesfull Lyngdoh Chairman ka Nongpoh Town Committee, Bah Vicky Syngkli Rangbah Shnong Iewmawlong bad kiwei kiwei ki nongïalam ka seng haka jingialang ka ba la long ha iing dorbar iewmawlong.
Ki nongïalam ba thymmai jong ka HYC Nongpoh Circle bala pynskhem ha katei ka sngi ki kynthup ïa u Samla Tony Shylla kum u President, u Samla Richard Diengdoh, Wolstar Rani, C Mawrie kum ki Vice President, Nicky Nongsiej Secretary, Michael Thongni Organizing Secretary, Ricky Ryndong Publicity Secretary, Lucky Star Kharshandi Education Secretary, Storen Makdoh Environment Secretary bad kiwei kiwei ki dkhot.
