Balei ba pyrshah ban pynkynriah Petrol Pump na Anjalee sha Upper Shillong kylli u Dy CM

Shillong, Nailar 04 : U Symbud Myntri Rangbah ka Jylla ba khmih ïa ka Tnad PWD (Roads) Bah Prestone Tynsong ha ka sngi Thohdieng ula buh jingkylli halor ka jingmut ha lyndet ka jingpyrshah ïa ka rai ka Sorkar ban ai jaka ha ka ban pynkynriah ïa ka Anjalee Petrol Pump na ka bynta ban shna ïa ka flyover ka ban weng ïa ka jingdheng kali ha Shillong.
“Hato phim pyrkhat ba ka jingpynkynriah ïa ka petrol pump na Anjalee ka kham kongsan ban ïa kiwei kiwei. Ngi la ïohi ïa ki briew ki la syllang shaba palat ha kane ka lynti na Umshyrpi shaduh 7 mer bad Banium ha kaba ka la shimpor haduh 2-3 kynta ba kin poi na 7 mile sha Shillong” ong u Bah Prestone haba ïakren bad ki nongthoh khubor.
Kane ka jingkynthoh ka la mih tang shisngi hadien ba ka seng FKJGP-Upper Shillong Circle ka la pynpaw ïa ka jingpyrshah kaba jur halor ka jingthmu jongka Sorkar ban ai ïa ka jaka jong ka Animal Husbandry ha Upper Shillong na ka bynta ban buh ïa ka Anjalee Petrol Pump.
Kat kum ka jingong jong u, ki Sengbhalang ne mano mano ruh ki dei ban ieh ha ka jingstad jong ka Sorkar ïa kum kane ka kam.
U Bah Prestone ula kam ruh ba ka Sorkar Jylla ha ka jingshisha kala pyrkhat bha haba shim ïa ka rai da kaba kyrpad ruh ïa ki trai ka petrol pump ban kynriah noh na kane ka jaka ba don mynta namar ka jaka ban pynnoh ïa ka flyover kan long ha katei ka jaka.
“Lada ngim ïoh ïa katei ka jaka jong ka petrol pump, kan long kaba eh ban ailaiñ surok bad ïa ka jingtei jong ka flyover ruh kumjuh, Namar kata, ka Sorkar ka la rai ba kan ithuh kumba 12,000 lane 13,000 sq.feet ka jaka na ka bynta ban pynkynriah ïa ka petrol pump sha Upper Shillong. Ngi donkam palat ba ngi dang don bun ka jaka na ka tnad Animal Husbandry, kaba long ym duna ïa ka 60 acre bad 13,000 sq ft kam long eiei satia hakhmat ka jingdon ïa kat kane ka jaka” ula ong.
Halor ka nongrim jong ka FKJGP ba ka jingai jaka ïa ka petrol pump kaba dei ka kam shimet, kan pynpulom noh ïa ka jing thmu jong ka Tnad ban buh ïa ka dairy bad kiwei kiwei ki kam ri jingri, u Symbud Myntri Rangbah ula ong “Wat na ka Sorkar Jylla, ka Sorkar Pdeng, ngi shim jaka na ki riew shimet, kaei ka jingma ïa kane?. La ka dei ka jaka Sorkar ne jaka shimet, nga sngew ba ka jingeh kam mih satia”.
“Kaba kongsan hi ka long ba ngi hap ban sngewthuh ba ka Shillong ka dei ka Nongbah jong ka Meghalaya bad katei ka jaka la ka dei kaba 4000 lane 5000 sq ft ka lah ban shakri shikatdei eh ia ka Jylla. Kaei ka jingktah ban ïabuji ïa katei ka jaka kaba kongsan eh da kaba ai 13000 sq.ft shabar ka nongbah Shillong bad khamtam eh shabar jong ka flyover ka ban pynshna da ka NHIDCL” bynrap u Bah Prestone.
Haba kylli, ula ong “Wat kylli ïa kum kane ka jingkylli. Phi ieh ha ngi bad kumno ban leh kan shong ha ngi”.