Lum u MLA Jirang ïa ki ophisar ba ïohnam ka Byrnihat kum ka shnong ba jaboh bha ka lyer ha India
Nongpoh, K’lyngkot 24: Tang hadien ba la paw ha ka kaiphod ba ka Byrnihat ka la ioh ïa kata ka kyrdan kum ka jaka kaba la jaboh bha ka lyer ha ka ri India, u MLA ka Jirang Constituency, u Bah Sosthenes Sohtun mynta ka sngi u la lum la lang ïa ki ophisar sorkar na ka bynta ban ïa kren bad ban thaw ïa ki lad ki lynti kumno ban pynduna ïa katei ka jingmih jaboh kaba lah ban ktah ïa ka koit ka khiah ki paidbah.
Ïa kane ka jingïalang la pynlong ha IB Byrnihat ha kaba la lamkhmat da u MLA, u Bah Sosthenes Sohtun kum u MLA bad u MDC ka Jirang, u Bah Victor Rani ryngkat ki ophisar sorkar ba kynthup ïa u BDO ka Umling C&RD Block bad uba dei u Assistant Commissioner, u Bah Eric Kevin Dkhar, u Senior Scientist ka ka Meghalaya State Pollution Control Board, u Bah S. Swer, bad kiwei kiwei ki ophisar na ki tnad sorkar.
Kane ka jinglum u MLA ka Jirang ban ïa kren halor katei ka mat, ka dei ruh hadien ba ka katkum ka kaiphod ka Centre for Research on Energy and Clean Air (CREA), ka la pynbna ba ka Byrnihat ka dei kawei na ka jaka ba jaboh tam ka lyer hapoh ka ri India.
Haba kren sha ki lad pathai khubor, u MLA ka Jirang, u Bah Sosthenes Sohtun, u la ong ba ka jingthmu ba la khot ïa kine ki ophisar sha kane ka jingïakynduh lang ka long ban ïa kren sani halor ki lad ki lynti kumno ban shim khia na ka bynta ban pynduna ïa katei ka jingmih ka lyer jababoh kaba la ioh nam ha ka ri India baroh kawei.
U la ong ruh ha kane ka jingïakynduh lang la ïa kren halor shibun ki lad ki lynti khamtam ka Meghalaya State Pollution Control Board kan sa shim khia ban ïakhun pyrshah na ka bynta ban pynduna ïa ka lyer jaboh kaba dei kaktkum ka juk stad ba mynta. Ngim lah ban tip kane ka jingjaboh ba la ioh nam ka dei kaba sdang naei, namar ha Byrnihat ki Karkhana ne ki jingthang plastic kam dei tang na u pud u sam ka Meghalaya, hynrei haba phai sha shiliang ka Byrnihat ki don ruh shibun ki Karkhana ha ki jaka ba hap ha ka jylla Assam.
Shuh shuh, kum u MLA ne u nongmihkhmat paidbah, u Bah Sosthenes Sohtun, u la ong ruh ba u khmih lynti ba ki ophisar kin ïa trei ryngkat ban ïakhun pyrshah ne ban wad ïa ki lad ki lynti ban pynduna ïa ka jingmih ka lyer jabaoh bad halor kane ka bynta la donkam ruh ban don ka jingïatrei lang naduh ki paidbah, ki shnong ki thaw bad ka sorkar da kaba ngin ïaleh ban pynduna ïa kaba thang ïa ki plastic ne kiwei kiwei ki ki jingpynmih ïa ka jaboh kaba ktah ïa ka mariang bad ruh ïa ka koit ka khiah ki paidbah, u la bynrap shuh shuh.