Khliehriat, Kyllalyngkot, 24: Ka Jaiñtia National Council, ka pynpaw ka jingsngew khia halor ka jingleh klet bad leh lyndet ka sorkar ka bym shym la kynthup lang ïa ka ktien Jaiñtia ha ka jingrwai Meghalaya Anthem, ka seng lyngba u President rangbah, u bah Sambormi Lyngdoh ka kren shai ba kam pdaing satia ïa kajingrwai Meghalaya Anthem ka bym shym la don ne kynthup lang ia ka Jaiñtia.
U bah Sambormi Lyngdoh u ong ba “Ka jingdawa ka seng ban kynthup lang ïa ka Jaiñtia ha ka anthem kam tang namar ka ktien hynrei ka dei shwa nyngkong ïa la ka riti ka dustur jong ka ri Jaintia, namar ka Jaiñtia ka la don lypa ïala ka history naduh ki spah snem mynshwa bad ka culture hangne ruh ka long kaba riewspa bad kaba pher bha hynrei kane ka sorkar ka la shu leh klet”
“Ka jingdawa jong ngi, ban kynthup lang ïa ka Jaiñtia ha ka anthem ka long ruh kum shi bynta ban pynshongnongrim, ka dei halor ki lai tylli ki ki major tribe (Khasi, Jaiñtia bad Garo), lada ka ktien English ka ioh ban rung kum kata ka official language, balei ia ka Jaiñtia pat kaba la don la ka history ba wat hashwa ba u phareng un wan ïuhkjat hangne ha ri jingngi ruh ka Jaiñtia ka la don lypa ryngkat ka niam bad ki riti ki dustur kiba lah hikai naduh ki mynbarim. Ka Jaiñtia kaba la don ïa u khlawait u Woh Kiang Nangbah uba ialeh na ka bynta ka ri hato ka sorkar ka mut ban lyndet ïa ka Jaiñtia ? ka constitution ka ri India ha ka article 29 ka la kren shai ba kano kano ka tribe ka don ïa ka hok ban ïada bad ban pynneh pynsah ïala ka ktien ka riti bad balei ba u myntri rangbah u ong pat katkum ka aiñ? Ka aiñ ba aiu kum kata kaba thmu ban pynduh ïa ka hok ka ri Jaiñtia kaba dei kawei na ki major tribe jong ka jylla, haba peit ïa kane wat ïa ka reservation policy ruh imat ka sorkar ka mut ban pynduh ïa ka kyntien Jaiñtia hynrei long katba long ka seng kan nym ailad bad nym pdiang hi ruh ïa kum kane ka jingthmu”
Ka seng ka sngew ban pynpaw ruh haba ha ki jingthoh la thoh ba ka Meghalaya ka don lai ki riew lum te balei hap ban pynduh bad pynjah noh ïa kawei ? ka sorkar ka hap ban pynsai bad jubab ïa kane’’
“Ka seng ka kyntu jur ruh ïa ki hynñiew ngut ki MLA bad 30 ngut ki MDC ba kim dei ban shu sngap jar hynrei ki dei ban kren halor kane bad da lei lei ruh ka Jaiñtia kam dei ban jah namar kane ka lah ban pynsngewsih shi katdei eh ïa ka nong Jaiñtia. Lai ngut ki myntri sorkar hapoh ka sorkar ka la biang eh ba kin leh eiei halor kane ka bynta. Ka seng ka pyrshah jur ïa ka ktien nongwei ha ka jaka kaba la don lypa bad ïa kane ka seng ka kwah ruh ba u mynrtri sorkar ba dei peit ia ka Art and Culture u dei ban leh ïa kaba donkam bad ban ai lang ïa baroh lai ki riew lum ban ïa kaba pynksan ïa kata ka ktien nongwei”
U President Rangbah kka JNC, u ong ba ïa ka Meghalaya State Anthem hi kan nym long pura khlem ka Jaiñtia namar wat ïa ka Meghaaya ruh la pynwandur da ki lai riew lum kata ka Khasi, Jaiñtia bad Garo, te kumno ha ka anthem pat khlem ka Jaiñtia bad ki nong Jaiñtia ruh kim lah ban pdaing ïa kane ka jingleh klet ka sorar ïa ka ri lum Jaiñtia.
